独家丨姚子羚虎年随缘搵对象 陈山聪考虑追B《铁拳》CP望演古装
2022-02-07 21:00 
姚子羚和陈山聪在新剧《铁拳英雄》第三度合演情侣，两人由Buddy到做CP默契更好，未来想再合作演古装，尝试演绎细腻感情戏。踏入虎年，两人虽然有机会休息陪屋企过年，但遇上疫情冇得玩，连愿望都变得实际，单身的子羚搵对象会随缘唔心急，反而想出书帮助小动物；而已为人父的山聪考虑追多个B前，想先搞童装生意。采访：杜杜 摄影：叶君海 发型：Taylor Wan@Hair Corner K-11(子羚)、Seiko Sin@hairculture(山聪)、化妆：Henry Li(子羚)、Chloe Yu(山聪) 服饰：DearBell2Ling(子羚)、bespoked_ianchang(山聪)
继《同盟》及《大步走》后，子羚和山聪在《铁拳英雄》第三度合演情侣，除了得到观众欢迎，大呼好衬外，两人都合作得特别开心。山聪认为大家冇尴尬，有助提升默契，「已经系称兄道地嗰啲Buddy，唔系朋友咁简单，变咗我哋投放感情到位，啲默契系嚟得好自然，唔需要咁多避忌，亦都互相信任。」两人都认为三次未够喉，可以继续合作，不过子羚笑山聪最近拍档愈拍愈细，「佢𠵱家啲女拍档全部都向下发展，嚟紧可能同炎明熹同Chantel（姚焯菲）嗰啲合作，哈哈！」山聪笑指凑完小花，下次可跟子羚拍古装，「我哋古装同一个剧试过，未试过做一对，古装系另外一样嘢，个情系收埋啲，戏味会再浓啲，玩多次可以试吓古装。」
拍得最辛苦剧集
讲到《铁拳》打戏不断，连平日娇滴滴的子羚都要变身打女，她坦承是入行以来拍得最辛苦的剧，「系一个考验，对我哋嚟讲系难，每日去到现场师傅讲一次，武师做一次，就要记住啲招式，时装嘅打同呢种功夫又好唔同，所以吃力唔单止系体能上，仲要系精神上，因为要赶及个进度，冇时间畀你慢慢练，同埋因为唔识打，变咗唔识得点样去保护自己。」山聪都心痛话：「佢两只手瘀晒紫色，阴功！」子羚解释：「山聪佢哋识嘅会做到就停，但我会直情用个骨撞人哋度，变咗好容易受伤。」至于山聪除了为一场擂台戏花个多月疯狂操肌外，还要急学咏春和泰拳，「拍之前（敖）嘉年帮我搵咗咏春师傅速成，总之要摆好个功架，手势要啱，理论知道就OK，泰拳就搵咗卢惠光师傅帮手，我打畀光哥佢二话不说帮我，去佢个拳馆教咗我10几堂，好多谢佢帮我呢个忙。」
出书讲小动物
在第5波疫情下踏入虎年，子羚未敢有太远的计划，「有啲嘢本嚟会发生都取消，不如顺其自然，既然计划都未必会成事，尽量呢啲时间休息，争取时间增值。」所以这段日子，子羚会多睇书，仲为另一计划做准备，「我有出书打算，同啲动物有关，要写嘢都要有返啲墨水，趁呢个时间吸收多啲唔同嘢，同埋都学习点样去调节自己情绪，疫情下我哋困住喺一个地方，好容易有好多负能量。」单身一段时间的子羚，早前在《新春开运王》自爆有3个追求者，连山聪也忍不住话：「3个呀！巴闭！」但子羚就解释，「3个太少啦！哈哈！戏剧效果嚟啫！」虽然子羚都希望虎年搵到对象，但绝对唔心急，「缘份嘅嘢要嚟就嚟，当然都希望嘅，但我唔想够钟要结婚，就去搵一个并非适合我嘅对象，最终有个唔开心婚姻，不如搵到一个啱嘅先至去做呢件事，至于生小朋友，都要搵到个觉得适合对象先会谂。」
搞网上童装生意
山聪2020年荣升爸爸，囝囝霆轩（Jaco）已岁半大，他与太太Apple虎年正研究会否追多个B，「我好想要多个细佬妹畀Jaco，但系我同太太都忙，生多个要谂清楚，因为如果有两个小朋友，太太唔可以再做嘢，呢样嘢要考虑清楚。」努力搵钱也是山聪新一年目标，因Jaco愈大愈多钱使，所以有意搞生意，「朋友话我咁锺意时装，不如出自己品牌，我𠵱家成日上网帮Jaco订衫，啲衫好鬼有型，啲朋友问我喺边度买，我忽发奇想就系出童装，搞童装生意，呢个有得谂，巿场好大，摆上网唔使有实体店，希望今年我完成咗啲剧集后，有时间plan吓有冇可能做到呢样嘢，搵啲厂或者投资者一齐合作。」
立即下载 | 全新《星岛头条》APP :https://bit.ly/3yLrgYZ
最新回应