独家丨Gigi Chantel Yumi Windy望虎年再进步牛年参加《声梦》令四小花成长

2022-02-04 21:00

Gigi、Chantel、Yumi和Windy虽然未识派开工利是，但已计划好似圣诞节时一样，会送小礼物答谢一班工作人员。

「声梦四小花」女团After Class的 Gigi（炎明熹）、Chantel（姚焯菲）、Yumi（锺柔美）和Windy（詹天文）今年是入行后第一个农历新年，回想牛年参加《声梦传奇》，她们都认为是成长重要一课，亦令她们更清楚未来发展目标和方向。展望虎年，四小花都各有愿望，虽然遇上疫情令演出机会大减，但她们会把握机会继续学习和进步，坚守当日参赛初心。采访：杜杜摄影：叶君海

新年会有几日假期加上疫情严峻，四小花会趁机留家好好休息。

After Class去年推出首支单曲《要为今日回忆》。

Gigi认为牛年是成长一年，当中有得有失，失去最多是时间，但好值得，「失去啲时间系做好有意义嘅嘢，譬如比赛同练习，增值自己，所以牛年令我成长同学到好多嘢，令目标更加明确，要努力去做个表演者。」去年夺得叱咤和新城颁奖礼新人奖，令Gigi感受最深，「我未参加《声梦》前，都系包包面、粗粗脚，睇返演嘅舞台剧，不过喺网上面系搵唔到，大家唔好尝试去搵，哈哈！见返以前自己个样，身形外表仲有演技，真系有啲尴尬，望返𠵱家攞到奖，仲有支持自己粉丝，感受非常深，发现真系成长咗好多，离目标愈嚟愈近，唔会再畀其他事动摇，会坚定自己。」

Gigi希望新一年可以不断进步，不忘初心。

未敢参与电影

虎年愿望，Gigi望跟家人早日团聚，「愿望系见到爹哋妈咪，爷爷嫲嫲公公婆婆，细佬细妹，亦想多啲见fans同观众，所以希望疫情快啲过去。希望呢一年，每日畀大家睇到我少少改变，有个前辈同我讲，要有改变先至可以令自己进步，但系唔可以远离唱歌个初心，当然自己有能力去做嗰样嘢，都会去尝试，之前有人问我会唔会想拍电影，首先要睇自己有冇能力去做，暂时驾驭唔到，唔会想去做住，做出嚟效果可能都唔好。」

Gigi虎年首要愿望，就是可以跟内地家人团聚。

新一年Chantel想多尝试演唱不同曲风。

想过放弃退出

Chantel认为牛年最明显的成长是学识控制时间，「喺牛年学识点样去处理自己时间，令到我学业好咗，因为识得安排时间，做嘢冇咁hea，之前会拖长去做。而比赛令我学咗非常多嘢，譬如唱歌心态，学咗要保持初心，唔可以放弃。而新人奖系个鼓励，冇预料过会有新人奖，真系好多谢大家支持。」虎年目标，Chantel想出更多骚，亦想试新歌路，最重要是够坚持，「虽然开过两次演唱会，如果可以开更加多骚，大家都会好开心。仲想带多啲好歌畀大家，可能出多啲唔同类型嘅歌。仲有保持初心，有时可能好想放弃，有时会好攰或者情绪非常负面时，就会觉得我唔想做呢件事，或者想退出，但谂起个初心，如果退出就会非常可惜，初心非常重要，一定要好坚定。」

牛年Chantel推出首支单曲《原来谈恋爱是这么一回事》。

Yumi露口风，虎年有望推出首支跳唱单曲。

有望出跳唱歌

牛年令Yumi学习和成长，也令她有所突破，「我之前都唱开歌跳开舞，都有尝试过跳唱，但系唔系几掂，到参加咗比赛，真系勇敢去尝试跳唱，觉得自己都可以做到，可以向住呢方面去行。而牛年牺牲咗自己同屋企人时间，嗰排特别忙，开头参加比赛真系唔识兼顾学业，但慢慢适应返，所以牛年真系学咗好多唔同嘅嘢。」不过虎年Yumi没特定目标，但刚满15岁的她开心有更多工作机会，亦会更注意身体健康，「一定要注意健康，因为前排一月一日表演自己都未病完，𠵱家疫情会少啲公开活动，但出街都危险啲，会多啲留喺屋企。」问到会否想牛年有出单曲机会，她即大卖关子，「个个都好希望有自己单曲，我就唔透露咁多，大家要留意（出跳唱歌？）可能系㗎！」

去年12月Yumi满15岁，可以参与更多表演工作。

虎年Windy没特定愿望，只想做好每个演出。

学识乐观心态

Windy认为牛年是大丰收的一年，参加《声梦传奇》令她获益良多，但亦承认参赛令学业退步，「比赛时唔系好识去兼顾所有嘢，但比赛完，9月开学后学业都慢慢追返嚟，都开心识得点样兼顾，所以我觉得丰收多过失去。」而Windy新年目标好简单，就是做好每场表演，「听落好似好简单，冇乜特别，但对我嚟讲好重要，仲希望自己可以更加乐观，因为有时我都会好似Chantel咁，情绪会超级负面，有时一次表演我唱得唔够好，走咗个音，我会好唔开心，自己对自己要求好高，但系呢条路系自己拣，会有好多难关、崎岖，沿途有好多人畀好多唔同意见我，有啲指摘或者网络上批评，就要学识有个乐观心态撑落去，希望自己心态可以转好，可以保持开头嘅初心。」