独家丨炎明熹佛系心态面对奖项 叱咤我最喜爱打入十强已满足

炎明熹（Gigi）在《声梦传奇》学员有份担正的青春校园剧《青春本我》首度演戏，甫播出首集已获赞喊戏够自然，她坦言全靠导演识得挞着她喊掣，又感激饰演父母的姜皓文和陈炜好照顾她，令她更易投入角色。提到打入「叱咤我最喜爱女歌手」十强，她已觉好满足，16岁人仔仲好老积话对奖项顺其自然，但不会信心全无，因望凭奖项答谢一班「Gi炎粉」（ 粉丝专属昵称）。采访：杜杜 摄影：叶君海  发型：Bluedy Wong  化妆：King Yip@KingsMakeup

Gigi虽然被赞演出，但觉得自己演技仲未合格。

Gigi自言平日甚少喊，特别在其他人面前。

比赛完《声梦传奇》后，Gigi完全没想过再有拍剧机会，「以为比赛完咗就完咗，估唔到成件事好似流水线咁样，一直延续落去，跟住有演唱会仲系我哋15个人，再有今次青春剧又有我哋15个，仲加埋《盛舞者》嘅一班学员，成件事好连贯，同埋畀好多机会我哋去尝试。」

面对住咁多镜头拍喊戏，Gigi紧张到喊唔出。

最终靠导演引导，Gigi顺利完成第一次喊戏。

爆Chantel为罪魁祸首

谈到首集喊戏获赞够自然，Gigi坦承最初完全喊唔出好唔掂，只是慢慢进步，「第一次拍喊戏系同Chantel（姚焯菲）一齐，嗰阵时就喊唔出，点解Chantel喊到我自己喊唔到呢？自己要反省吓，因为练习时我系喊到，但嗰日有记者嚟探班，有咁多镜头对住我就喊唔到，导演见我迟迟都未喊，就引导我去喊，不过导演就话自己喊好过人哋引导，因为引导你喊会笃中你一啲唔开心嘅位，自己要好多时间去处理嗰件事，自己喊相比起嚟冇咁难受。」不过追问她导演在耳边讲了甚么挞着她喊掣，她就笑得好古惑话，「我系唔会讲，一直都冇讲出嚟。」

Gigi大爆Chantel经常忍不到笑累街坊。

演Gigi父母的姜皓文和陈炜，对她照顾有加。

自言好少喊的Gigi，听歌亦有助她拍喊戏，特别是剧中插曲、由Aska（张驰豪）和莲姐（林君莲）创作的《复杂》，「开头听呢首歌冇乜感觉，慢慢喺套剧度，开始熟识个角色，同埋熟识自己个背景，慢慢就代入到就喊，第一次喊时真系未咁代入到，每日拍对角色理解再深啲，后尾拍嘅喊戏真系顺利咗。」她仲好叻话完全不用靠眼药水喊，「通常化妆师姐姐帮我滴眼药水都会吸晒，因为我只眼真系太乾，所以最终都系自己喊多过用眼药水。」Gigi喊唔叻，不过笑就好容易，她仲踢爆罪魁祸首是Chantel，「其实我一开头冇笑，我要喺度爆Chantel出嚟，佢忍唔到笑，因为我见到人笑我就会笑，我忍笑忍到到成张櫈都系汗，忍到标晒汗出嚟。」

姜晧文教Gigi放胆演，不用怕NG。

Gigi坦这最初是不好意思才会拒绝陈炜食糖水邀请。　

获剧中父母特别照顾

剧中姜皓文和陈炜饰演Gigi父母，她初次跟大前辈合作难免紧张，幸好这对「父母」好识教女，「开头会有少少惊连累大家，但系姜皓文前辈同我讲『你唔好惊NG，即使再好嘅演员都会有NG或者读错对白，所以你唔好理呢啲嘢，总之将你个情绪代入角色，投入同去享受过程就得。」至于厨艺了得的陈炜就最着重「囡囡」伙食，「佢惊我食唔饱，第一次见佢就问我同姑丈食唔食鱼片云吞嗰啲，我话唔使佢最终都买咗，第二次同剧入面嘅爹哋妈咪拍，佢就问我饮唔饮糖水，我就话『前辈真系唔使，我真系拣唔落手，你哋食就OK』佢竟然话『你既然拣唔落手，就全部点晒佢啦』唉！后尾我都拣咗个糖水。」而她最难忘有场同「父母」开餐戏，「佢哋塞晒啲嘢畀我食，搞到我成个口都系嘢食，feel到好有一个家庭嘅感觉。」

Gigi凭首支单曲《真话的清高》入围各大音乐颁奖礼。

一直得到「Gi炎粉」全力支持，成为Gigi争奖信心来源。

对于首度参加各大音乐颁奖礼，早前更成功打入「叱咤我最喜爱女歌手」十强，Gigi特别感谢一班投票的粉丝，「自己始终系个新人，大家咁支持我已经好开心，我真系冇话要入到五强，我本身以为自己连十五强都入唔到罗！冇谂过大家会投票畀我（最终入到十强？）真系好开心，好多谢大家支持，真系唔知讲咩好。」至于对新人奖会否信心较大，她就贯彻佛系态度，「呢啲嘢就顺其自然啦！如果自己太在意嗰样嘢，就会令到自己有压力。」但她为了粉丝不会完全冇信心，「我唔想辜负fans对我期望，所以如果我有呢个能力，我都会尽力做好自己，但系攞奖呢啲就顺其自然。」不过她刚攞「劲爆新人奖」，算有交待。

早前Gigi在《新城劲新爆颁奖礼2021》夺得「劲爆新人奖」。

Gigi新年愿望是早日疫情稳定，可跟父母见面。