独家丨郑嘉颖为供两个仔读大学唔谂退休 自认现实 再攞视帝无助加片酬

52岁的郑嘉颖跟30岁陈凯琳(Grace)结婚3年多，三年抱两成为两子之父，因为仔细老婆嫰，郑嘉颖有排都冇得退休，坦言要继续拍戏为儿子积谷防饥，最重要留笔钱令嫰妻得到保障。对于《星空下的仁医》中「胡须医生」一角打入TVB台庆颁奖礼视帝五强，嘉颖难得坦白，坦言自己冇票房保证，再攞视帝无助加片酬，讲到明最想退休前可以拍到一部能令观众记得角色嘅戏。采访：方骞平 摄影：叶君海 服装：Lane Crawford 化妆：Henry Li 发型：Sue Cheung 场地：酒锅

嘉颖金句 郑嘉颖强调每个人时间有限，要花喺值得嘅人身上，他睇时间紧要过睇钱。

 

嘉颖为家庭改变好大。

 

嘉颖未打算退休。

由郑嘉颖、古天乐、张智霖等主演的电影《G风暴》将于本月31日上映，同样系ICAC调查员嘅郑嘉颖面对涉贪细佬黄宗泽好两难，角色要游走亲情与公义嘅灰色地带之间，片中有唔少爆破、枪战、动作场面，加上系反贪风暴系列终极篇，剧本执得好紧，每日要应付「飞纸仔」，嘉颖话好彩都算ok；最难忘场口喺兰桂坊取景时，跟醉酒客发生言语顶撞风波：「其实我知傻，精人出口笨人出手，好彩我冇出手，以后尽量避免。」他直言婚后进步咗会谂多一层，唔想影响屋企，唔同以前为啖气唔理后果。 

尽量小心 电影《G风暴》有唔少枪战戏份，嘉颖答应老婆会尽量小心。

 

好有火花 郑嘉颖再次同古天乐合作好有火花。

 

片中郑嘉颖面对涉贪细佬黄宗泽好两难。

求演深入民心角色
对于喺TVB台庆剧《星空下的仁医》中演「胡须医生」可望再冲视帝，嘉颖斩钉截铁话唔应该畀奖佢：「我攞过再攞都分别唔大，无助我嗌高啲片酬，我冇票房保证，我好现实，对我要养多20年嘅囝囝嚟讲冇帮助，不如留畀不停喺TVB拍剧嘅演员嚟鼓励佢哋。𠵱家返去拍剧首要系睇剧本、角色系咪吸引，其次钱要OK，奖项对我嚟讲唔系考虑因素。」嘉颖最想退休前可以拍多几个深入民心的角色，「拍咗4年几电影(角色)都讲唔出一个，革命尚未成功。」

首封视帝 2006年嘉颖凭《天幕下的恋人》首封视帝，带畀佢好多搵钱机会。

 

胡须医生 好受小朋友欢迎嘅「胡须医生」，可望为嘉颖再冲视帝。

 

「Law霸」最劲 《怒火街头》「Law霸」角色成为嘉颖代表作。

 

深入民心 《天幕下的恋人》「沈朗」一角深入民心，亦跟周丽淇(励淇)发展地下情。

 

一哥地位 5年后《怒火街头》令嘉颖两夺视帝，奠定「TVB一哥」地位。

 

Hit爆八爷 郑嘉颖凭《步步惊心》「八王爷」角色成功打入内地市场。

唔谂追女怕差太远
因为老夫少妻及老来得子，嘉颖冇得谂退休：「其实我好想多啲时间陪吓屋企人，作为父亲养仔系基本，仲要去教，好似早排大仔郑承悦见人就动手，我要纠正佢。」嘉颖难得讲家事，坦言大老婆22年，同细仔郑承亮相差50年，要养两个仔多20年先至大学毕业，坦言，「我生得出有责任睇住佢哋，所以要留笔钱积谷防佢哋饥，有钱先安心，但又好矛盾，以我经历穷到乜都冇嘅时候系最勤力，可能将来会同佢哋讲『老窦死咗乜都捐晒出去』但点都要留畀老婆，老婆留畀佢哋我就冇法。」不过，他却相当enjoy唔觉辛苦：「佢哋带畀我人生最快乐。」问到怕唔怕追女时，父女年纪相差60年？)唉…咁避都有咪有罗，我唔敢想像，未发生唔好谂住。」语毕他即截停记者话唔好讲呢啲，场面搞笑。

著重身教 嘉颖觉得教仔身教相当重要。

 

好锡嫰妻 嘉颖好锡嫰妻，再辛苦都要畀到Grace生活保障。