独家丨泰臣暂时会专注做演员 首次编导音乐剧压力大
2021-12-16 23:00 
泰臣与剧团「一路青空」合作、首部编剧及导演合家欢音乐剧《捽！捽！捽！神灯大冒险》，因疫情由去年改为今年圣诞节及元旦公演，他多了一年时间准备，沉淀过再修改剧本，但亦因改期令原先演员有好大改动。他承认做导演满足感大，但压力亦不少，所以短期内都会专注做演员。撰文：杜杜 摄影：沈健程
该音乐剧延期演出，令泰臣多了时间去思考剧本，「以前系咁赶可能会有啲盲点，而家有个宁静状态，有啲位可以再执好玩啲，连结局处理手法都唔同咗，因为我有空间做一啲艺术上改进。」延期令部份演员未能参与演出，亦令泰臣的如意算盘打不响，「旧年都排咗七、八成，谂住今次接住再排就得，但系新嘅演员又会有佢哋理解个故仔方法，连主角都换咗，所有嘢都要排过。」
当送给观众礼物
有过去年经历，泰臣都担心今次会再受疫情影响，令台前幕后心血浪费，「等如整完个圣诞大餐，唔可以食住仲要摆喺冰箱，都惊会坏或者冇咗。」不过有过去年一轮宣传，加上疫情关系，令今年门票销情相当理想，泰臣亦视为送给观众的礼物，「唔排除啲家庭冇得去旅游，要喺香港搵节目，就当我哋喺圣诞同新年送一个礼物畀大家，一家人去享受，睇完有个亲子时间去沟通系最正。」
执导完这次后，泰臣暂时想休息专注返演员工作，因压力实在太大，「以往只系演真系好轻松，戏嘅节奏，拿捏个张力，点样同设计师倾啲设计系导演做，演员唔使谂。短期内唔做导演住，好消耗精神，做导演真系唔好立乱做，系好有满意感，但系太投入时，搭车过嚟已经开始度嘢，做演员时可以好轻松去食个靓饭，但系做导演只会买个包，但系到胃痛先至记得食。」
最新回应