独家│BabyJohn陪老婆行街孭晒战利品 持家有道Keep单悭泊车钱

蔡瀚亿（BabyJohn）同梁祖尧、陈俞希（Hailey）主持ViuTV节目《晚吹- 空肚讲宵夜》劲有火花，令佢哋成功入晒屋。早前仲添食拍埋《宵夜烧到过埋夜》，播出同样大获好评。不过BabyJohn本业始终系演员，最想当然系拍电影，但疫情打乱晒啲电影开拍计划。虽然钱系搵少咗，但反而多咗时间陪屋企人。日前BabyJohn趁得闲，化身爱妻号陪老婆行街，买完嘢都Keep返啲单悭返泊车钱。采访:谭壹致

BabyJohn同老婆结婚8年，甚少公开放闪。日前两公婆同朋友行商场，蔡太同女友人鸡啄唔断，BabyJohn就做跟得老公，啲环保袋拎到一抽二掕都冇怨言。行到一半BabyJohn单拖去询问处问嘢，再会合返老婆同朋友。见BabyJohn途中都有拎啲单数吓，唔知系咪未够数攞泊车优惠，蔡太就惟有买多两包化妆棉同棉花棒凑数，呢位贤妻喺计数方面好帮得手呀！

一行三人逛到入黑各自离开，BabyJohn去攞车之前再逐张单数吓使咗几多钱，似系想确保攞到商场泊车优惠，悭返少少当帮补。BabyJohn仲唔使老婆陪自己行到老远排队扱泊车飞，叫老婆企定定等佢，最后做埋「柴可夫」，两公婆齐齐返归。