独家│KB瓣数多叹Tea忙度桥 搞鬼性格惹女友人笑唔停

李健宏（KB、Kevinboy）可以话百足咁多爪，除咗夹Band做鼓手呢样正职，平时仲有做吓节目主持，又有做经理人，仲要经营YouTube频道《KidneyBuster》。而YouTube频道相信系最晒佢脑力嘅业务，事关佢呢个频道有好多不同题材影片，最受欢迎嘅一定系「情义两难全之玩爆你个肾」系列。日前本报见到佢同一名相信系同事嘅女子喺天后食Tea，佢都好似好多嘢谂咁，唔知系咪谂紧下次整蛊边位艺人呢？采访：梁志明

KB日前晏昼3点左右，同一名女子喺天后一间食烧鹅嘅食店叹下午茶。二人用餐时全程都冇乜交流，各自睇手机，女方直情戴埋耳机似系睇紧戏，如果唔系一齐落单，真系以为佢哋搭枱。而KB就好似好多嘢谂咁，个样有啲苦恼。只手就摸完下巴又摸额头再摸眼，仲要摸埋个鼻，疫情期间，希望佢有消毒乾净对手先咁做啦！

后巷陪食烟吹水

KB与同行女子食完嘢就埋单走人，女方仲将收银员工找嘅钱，递返畀KB，相信系由KB请客。而KB一食饱就好似叉咗电咁，系咁同个女仔倾偈。二人喺后巷坐低倾多几句，个女仔就顺便食支烟，KB就似乎有啲眼乾要滴吓眼药水。其间KB唔知讲咗啲咩，搞到个女仔笑到打佢，睇嚟KB真系好幽默噃！大概5分钟后，佢哋就各自离开。