独家丨黄浩然带家人去食米芝莲拉面 着Shocking Pink背心行街好抢眼

因为14年一场大病，令黄浩然(Raymond)突然觉悟，唔好做死自己，要平衡工作，同花更多时间陪屋企人，病过方知身体健康的重要性，自始Raymond就狂做运动，特别系跑步，日跑夜跑又做Gym，而家变咗钢条，仲感染埋老婆同两个仔，分别系10岁Kayden及8岁Ransley，家庭乐就系做运动。采访:梁志明

日前傍晚，着住Shocking Pink背心，潮孭心口斜孭袋的黄浩然同老婆及两个仔现身铜锣湾百德新街，老婆拖住细仔行快啲，一家之主同大仔殿后，其间黄太行过间时装店就指畀老公睇，睇嚟有嘢睇啱，不过最后冇入铺，原来佢哋赶住去医肚。

黄太买嘢谂过度过
黄氏一家去咗食过江龙，连续两年夺得《东京米芝莲》一星荣誉的拉面店，食咗两个钟满足离开，食店对面嘅楼上好似有Crew拍紧嘢，唔知拍戏拍剧定拍广告，黄浩然同老婆一出食店就发现，两人忍唔住抬头望咗几眼，男方就轻揽老婆条腰示意向前行唔好再望，然后黄太就行去睇瑜伽运动服，见佢睇中件橙色Top，拎起望咗一阵，一件几百蚊，本身有家底，老公又搵到，买得起有馀，不过，黄太谂咗阵都系放低，喺店内行咗半个钟就同老公及两个仔离开。