独家丨方中信罕提家庭做一次爸爸就够 男神对谈 以为陈家乐二字头

方中信跟陈家乐主演电影《一级指控》，首度合作齐演大状，法律题材戏固然难演，两人觉得最可惜是失去好拍档及好前辈廖启智，方中信大赞智叔高超演技，而家乐透露智叔在片场如开班授课。35岁家乐最初面对58岁方中信演戏坦承超紧张，但拍落两人变老友，方中信提议下次可演父子角色，因以为家乐只有廿几岁，而方中信戏中跟小童星演父女感觉自然，他直言真实做老窦一次就够，拍戏玩吓就算。撰文：杜淑霞 摄影：沈健程 发型：Kenrick Siu(陈家乐) 化妆：Fiona To(方中信)、khaki yan(陈家乐) 服装:i.t(陈家乐)

戏中方中信饰演打官司如做生意的巿侩大律师，而家乐则演初出道仍好有火的大律师，为了一单富豪之女被杀案两人企埋同一阵线。其实拍完后，家乐多次跟记者提到此戏，相当期待电影面世，他解释期待之处，「剧情讲嘅message都好啱我哋香港观众去睇，唔系一般合拍片好商业元素，呢套系香港人好睇得明嘅电影，呢类题材好难拍，一般拍啲亲情爱情嘅戏会容易啲拿捏，或者容易啲入口，呢套好多口水战，如果拍得唔好，观众好容易唔明我哋拍紧乜嘢，我觉得呢套戏节奏掌握得好好。」方中信亦好认同电影好多灰色地带，给予观众讨论空间。


面对方中信紧张

首次饰演大律师的家乐，接拍前已觉得好紧张，仲要对住一班资深前辈演戏，不过方中信对于家乐笑着话：「你讲系对住智叔（廖启智）、鲍姐（鲍起静）、曾江嗰啲，讲到我同佢合作，因为我年纪大佢少少之嘛，几好玩。」家乐说：「开头就系好惊方生，就系唔知佢边句真边句假，成日觉得佢个样好严肃、好恶，拍落好玩好开心，特别系当有谭耀文同佢一齐时，我觉得佢哋两个玩得仲癫过我。」但方中信亦力赞这位后辈，「而家年青一辈演员，家乐畀我感觉系好用心嘅演员。」家乐承认面对方中信演戏实确有压力，「导演想我哋一次过拍晒一场戏，首先拍咗方生两分钟嘅独白，方生系一句都唔甩嘅，跟住到我甩咗咪大镬，呢啲位我都好紧张，希望顺住情绪一次过做晒。」


智叔离世感可惜

方中信和家乐都觉得最可惜是电影上映时，但饰演富豪的好拍档廖启智已离世，私底下跟智叔经常跟发哥周润发一齐跑山的方中信感受特别深，他更大赞智叔戏中跟曾江一场戏极精彩，「喺游艇嗰场戏佢同曾江叔做得非常之好，佢哋两个好有份量、资历嘅演员，一齐做一场戏非常好睇。（乐：系高手过招！）净系得佢哋两个，但系好好睇。」家乐提到智叔亦有遗憾，「我同佢都有几场法庭戏，好记得佢嗰时做咗个表情，我仲问佢『你呢个表情系嚟到先谂，定系睇剧本嘅时候已经研究咗』，佢跟住就同我讲咗好多演戏理论，佢嘅谂法，我觉得好好，一个前辈喺现场有时间仲会好帮你，同你分享佢嘅经验，当时我仲话『如果夹到时间跟你上堂就好啦』，一路喺其他电影都有同佢撞过都有提过，但最后未有时间跟佢上堂，已经冇呢个机会，我觉得好可惜。」

下次合作演父子

讲到电影因疫情延期上映，方中信也透露仍有3部电影因疫情仍未知上映日期，而工作量亦未全面回复正常，「唉！咪天一半地一半罗！啲工作量系少咗一半，始终因为疫情，而家开始好番少少罗！希望可以唔使隔离，呢个最重要，我哋拍《金手指》几日检一次，一去到现场有个帐篷喺度撩喉咙。（记：但多咗时间陪阿女？）系嘅，每日做例牌嘅工作，跑步做运动，买餸返屋企，通常唔使开工就系咁。」


两人这次合作愉快，问到下次合作可演何种关系，方中信竟然抢先话，「做我个仔罗！（乐：其实有唔少人话我似你，当我剪到你咁短头发嘅时候）」最搞笑家乐讲完竟然面都红晒，但方中信帮口话：「佢靓仔过我！（记：你以前靓仔啲！）唔好讲几10年前嘅事，又喺度hurt我。（记：家乐做你个仔会唔会大咗啲？）佢廿几岁之嘛！（乐：我30几啦！）唔讲边有人知，呃到人。（乐：如果我可以大个啲，有方生咁fit就正，日日跑山喎！）跑完真山，啲女个学费，个老婆啲使费又要跑山，哈哈！」


讲到演爸爸角色，方中信承认当爸后更加得心应手，「我相信而家同小朋友合作，做爸爸角色一定好过佢（家乐）哈哈！你抱BB可能好啲。基本上今次个小妹妹好戏啫！（记：想经历多一次做爸爸？）呢啲嘢经历一次算，拍戏玩吓就可以。」家乐就透露早前跟《把关者们》演刘佩玥囝囝的小演员一样好老友，「我都当佢同辈咁样，佢出咗个post都话，我系唯一一个唔当佢系小朋友，我玩吓佢，有时搭吓膊头好friend咁。」