林芊妤囝囝3岁生日 「伯伯」为一支蜡烛又喊又笑

林芊妤（Coffee）经常喺社交平台分享囝囝「伯伯」翟德彦嘅有趣日常，聪明伶俐加上表情多多，获唔少广告商青睐，人气拍得住Lucy妹妹。

噚日系「翟伯伯」嘅3岁生日，Coffee邀请咗好多家长同小朋友一齐开生日派对，伯伯以《Paw Patrol 汪汪队立大功》嘅造型登场，十分醒目。伯伯以前都有开个人IG账户，有睇开嘅朋友都知伯伯好锺意吹蜡烛，无论边个生日，蜡烛在前都会忍唔住「吹吹吹」熄佢。

今次虽然系男主角，但同场有好多天真烂漫嘅小朋友，喺Coffee上载嘅片段中可见，原本系伯伯专属嘅吹蜡烛环节，竟然出现好多小朋友一齐争，其中以吴日言囡囡最进取，搞到伯伯扭计爆喊，Coffee笑问吴日言：「可唔可以stop吓你个女呀？」场面爆笑，最后一支蜡烛保守估计吹咗5、6次咁多。

Coffee留言：「嗱嗱嗱～今次真系你都有今日啦！成日吹我蜡烛啊啦🤣#小朋友真系好锺意吹蜡烛。」佢仲扮伯伯留言：「Wt??你唔系女仔我早就出手啦。」之后Coffee再贴一家三口相，好感触咁话：「3岁生日!!朋友都知道我这个人没什么仪式感，所以节日都是随心过，BB出生后也没请过朋友开派对，但今天是Bb的3岁生日～感觉他长大了很多也懂事了。所以我认真地搞了场大龙凤讨他欢心，奔波劳碌了一整天，但看他那么兴奋就觉得值得啦，但三年才搞一次好了🤭😂。#果然是母亲受难日😂#我需要几天的休养啊」不过伯伯超开心，仲讲明：「很开心很开心🤩以后年年都要这样过！」