Kelly Online｜林大辉：成立体育发展局更好

《施政报告》前日出炉，提出要设立文化体育及旅游局，将现行隶属民政事务局的文化事务和商经局的创意产业和旅游，加埋体育一齐大搞。体育学院主席林大辉同卢骏倾开偈，就话如果独立设立「体育发展局」更加好。

林大辉解释，体育、文化与旅游，其实无大关系，如果想搞产业化，体育、文化同年轻人关系更大，甚至与教育都有连系，在体育方面制造运动服饰用品、搞体育活动都可以做产业，但同旅游无直接大关系，依家最多系有海外人士专程来港睇国际七人榄球赛。

所以，林大辉赞成未来独立设体育发展局，如果怕新局范畴唔够阔，他个人认为喺民政局辖下增设体育发展署都得，即系由D8常秘或D6级嘅官专责去搞，甚至乎成立文化体育局亦得，唔使加旅游，质疑唔通「三合一」就等于可以做到产业化？

如果未来设新局，就要搵局长，真系「三合一」嘅话，林大辉笑言，要搵个人熟识体育、文化，仲要识旅游，仲唔系文武全才？唔止，此人更加要识做生意，唔系点搞产业，咁又搵唔搵到呢个人？真系要问问政府先知。