独家丨Lokman认有私心向AK Say Sorry 恨同Alton 阿Dee出歌意义大过《虎道门》

MIRROR正副队长Lokman和Anson Kong（AK）最近首度推出合唱歌《虎道门》，两人都话由创作到拍MV都超好玩，好想再有下次。不过讲到最恨合作队友，Lokman竟然自认私心话想同Alton和阿Dee，仲讲到明意义大过同AK合作，不过已靠拍《调教你MIRROR》医好情绪问题的AK又点会咁小气，仲话好期待作品面世。而两兄弟又自爆拍《水著考有Feel》似足去度假，更狂笑自动放弃机会的Tiger劲后悔。撰文：杜杜 摄影：叶君海 形象：PIPA Creative 发型：Man Chan@Chic Privat i Salon 化妆：Giann Cheung@AnnieG. Chan Makeup Centre 服装：Harvey Nichols、Giuseppe Zanotti 场地：Jas Party

AK去年开始出Solo时，已想到搵兄弟合作，「好想做首歌有Rap元素，第一个就谂起Lokman Rap嘅时候，好想同佢做只歌，但系上年第一年出Solo，花姐话出自己歌先，今年出咗《黑之呼吸》后，我就问花姐可唔可以有呢个计划，佢就话『好，你哋自己去玩』。」两人都话合作超爽，已预告随时再合作，Lokman更话宁愿出合唱歌多过想出Solo，「畀我拣想拣合唱歌多啲，因为真系好好玩，Solo都好玩，可以讲自己嘢，但系同人交流多啲会正好多。」AK亦好认同，更自爆今年会再跟队友合作，「我今年仲有两只歌出，其中一只都会搵队内嘅兄弟合作，同兄弟一齐玩可以有唔同火花，我就唔开名，大家期待吓！」



讲到想跟边个队友合作，Lokman自认有私心组合，「好想我、Alton同埋阿Dee，我哋一齐做首歌个意义真系大，对唔住啦！（望AK）大过我哋呢首嘅，Sorry Sorry！（AK：明白嘅）」Lokman坦承好期待这个组合，初出道时已跟花姐提出过，「如果我哋出一首歌应该正喎！应该会好玩。」同样期待的AK更连歌名都帮手度埋，「就叫《LA Trip》，我哋都见证呢件事，见到阿Dee同Alton嚟，见到佢哋咁样我哋都好开心，都知道呢件事对佢哋三个嚟讲系mean something，系个好难忘珍贵回忆。如果呢个组合出歌，我自己都好期待，到底你哋三个会搞到啲乜嘢呢！？」

AK靠《调教》医好情绪问题

这天见到AK跟4月接受《头条》时，压力爆煲流下男儿泪分别好大，回复活泼开朗的他承认，拍《调教你MIRROR》令负面情绪一扫而空，连医生都唔使睇，「佢哋帮我睇番好啦！佢哋呢班医生，阿祖亦系一个好好嘅医生，camp之后搵番自己亦都搵番大家，大家再连系番一齐，好多嘢都解决咗，冇咁大压力，就算有压力可以交畀佢哋一齐分担，系一个最大抒发。（同阿Jer心结解开咗系一个好重要关口？）嗰个心结其实唔系对阿Jer，其实系对自己，一时谂唔开钻咗个牛角尖，解开咗个死结之后舒服晒！」



Lokman承认入camp期间大家朝夕相对，有助增进感情，「由起身到瞓觉都系12个一齐，迫住交流、倾偈，有时唔讲唔讲就会有啲误会，或者沟通上错误，讲咗出嚟握个手就搞掂。」AK再补充，「最紧要个拍摄系冇乜嘢做，去玩同食好嘢，我哋都同公司讲每年十几日畀我哋去个camp叉吓电。」两人异口同声话去离岛都满足，Lokman说：「唔好讲离岛，拍完上次个水上乐园（《水著考有Feel》），都觉得系放假。」因他们一连拍两日，第一晚拍完大会安排了酒店给他们休息，AK说：「我哋带齐晒听歌嘅嘢，准备晒一齐睇咩戏，嗌乜嘢食，真系度假㗎！」AK更大爆本来他冇份享受，有个「傻仔」放弃咗机会，「Tiger拍完《力图打排球》后话攰唔去，又话唔想晒黑，叫我帮佢顶，佢嗰时都未知道咁多细节，佢谂住辛苦嘢，点知系放假mode，畀咗个咁好嘅回忆我，佢知道之后劲后悔，哈哈！第二日出嚟后，我哋约埋一齐去睇阿祖嘅舞台剧，我哋不停畀啲相，讲发生嘅事畀佢听，佢几鬼嬲呀！」所以他们好想疫情后一齐出trip，AK说：「好似之前拍《Mirror Go》咁样出外景，真心想12个一齐出埠，阿祖都即刻报名话『唔理你哋去边总之我要喺度』OK冇问题！」