头条戏场丨《沙丘瀚战》等救世者不如靠自己

电影改编自Frank Herbert的畅销小说系列《沙丘魔堡》(Dune)。由《银翼杀手2049》金像提名导演Denis Villeneuve执导，入场前非常有期望，开场不久已觉得拍摄手法和摄影好有《银翼》味道，再加上Hans Zimmer的配乐，配上浩瀚沙漠气势相当磅礴，用史诗式形容都唔过份，终于明白导演点解宁愿一等再等都一定要安排电影喺戏院上映，加上男主角Timothée Chalamet 360度无死角靓样放题，唔睇IMAX系你损失。(上映中) 撰文:廖思慧


故事背景设定于数千年后，一个名叫Paul Atreides(Timothée Chalamet饰)的年轻男子卷入一场跨星系斗争。Paul是阿特雷斯皇族的继承人，父母是好打得又备受子民爱戴的统治者雷托阿特雷斯公爵Duke Leto(Oscar Isaac饰)及强悍女战士积西嘉阿特雷斯夫人Lady Jessica (Rebecca Ferguson饰)。因为被灭族，Paul被迫由卡拉丹星(Caladan)著草至遥远的沙漠星球「阿拉基斯星」(Arrakis)。

抢资源都畀条生路吖
而「弗雷曼人」(Fremen)就系住喺「阿拉基斯星」，原住民都称呢个沙漠星球为「沙丘」(Dune)。沙丘盛产一种非常有价值能启发人类潜意识及令人上瘾的独有香料(Spice)，一向以嚟阿特雷斯家族及哈根尼家族都是争夺香料控制权的两大势力，想独吞有咩办法?你懂的。故仔简单嚟讲太空有唔同的星球部族，每个部族都有唔同能力，如Paul的妈妈就识得用声音控制人，而阿拉基斯星原居民就能控制沙漠巨虫，亦可深入沙漠地底去逃避灾难。而所有部族由一个帝国所管辖，两个半钟的《沙丘瀚战》属于第一部曲，讲述帝国话事人眼见某族愈嚟愈劲好唔锺意，谂计灭佢族，但唔系你话要灭就灭到，呢个世界总有人睇唔过眼帮拖，然后终极继承人走甩咗，好勇嘅阿妈仲教佢唔可以惧怕，只有战胜恐惧先可以生存，等救世者不如靠自己。

张震只系出场五分钟
点解会拍呢套戏？导演咁讲：「我细个发现呢本小说，深深被佢嘅诗意及对大自然嘅描绘所触动，大自然系《沙丘魔堡》中真正嘅主角。嗰阵我修读科学，理想成为导演或者生物学家，所以Frank Herbert将生态学融入小说中嘅手法，对我嚟讲好新鲜、好有诗意及深刻，佢对大自然嘅睇法、所创作出嚟嘅生态系统，都非常引人入胜。佢又探索咗殖民主义带嚟嘅影响及乱局，不但系20世纪的写照，即使到今时今日仍未过时。」终于可以达成梦想，将《沙丘魔堡》拍成电影的导演非常开心：「《沙丘瀚战》系心理惊栗片、冒险电影、战争片、青春成长电影，甚至系爱情故事。呢本小说多年嚟都喺我嘅书架上及床边，唔系冇原因。」

作为Tim迷散场后超满足，大头靓様放题。张震出埸唔够五分钟，但佢角色好重要，最葡萄佢可以摸Tim仔块面。全程如身历其境，顶级视听观影感受，服装道具超靓，细节亦好有惊喜，好少睇戏用享受嚟形容，呢套可以。