【星岛独家】王梓轩邀上《演斗听》追问整容传闻 胡鸿钧以创作歌《刀削面》回应

缠绕胡鸿钧多年的整容新闻，他将于今晚11点半，TVB第五集的《演斗听》节目中豁达面对，藉创作歌曲《刀削面》回应整容疑云。

《演斗听》重点环节「我点你作」中，胡鸿钧（Hubert）用了社交平台一个post创作《刀削面》，将整容新闻摆上枱。当日录影时，郑嘉嘉大胆问Hubert有冇整容？有备而来的Hubert话：「都估到你问呢啲问题，用张相嚟答你！before（指着已列印出来的社交平台post），after（指着自己），整容失败，呢个刀削面可唔可以系嚟紧嘅topic呢？」

Hubert坦言：「嘉宾要攞最有话题性嘅题材做主题，所以某程度上，都系要诚实面对自己，更要豁达将一啲别人眼中未必系最好嘅新闻，透过创作同大家分享，我觉得几有意思又好听，其实我之前只歌《整亲》，某程度上都围绕呢个主题，每个人都会遇到啲负面新闻，希望大家唔好放大呢啲声音，继续为追求理想努力。今次嚟到呢个环节，我攞返自己最多人讨论嘅话题，希望透过今次新嘅音乐模式，用一个比较funny嘅方式表达出来，最紧要好玩。」

花边新闻变艺术
问王梓轩要Hubert以《刀削面》创作，怕唔怕对方嬲？梓轩话：「我唔惊！反而戥佢开心，因为嚟《演斗听》最好玩嘅，就系歌手可以用同我哋一齐创作嘅歌曲去回应负评，今次讲『刀削面』，表面上可能会觉得好尴尬，（会唔会令佢难堪？）其实系佢自己攞出嚟，呢个topic佢平时唔会用把口回应，可能佢觉得冇需要，但答案其实已经写咗喺首歌入面，亦好好听，我哋希望将花边新闻变成艺术、音乐。」梓轩补充说：「Hubert同郑俊弘上嚟之前做好晒心理准备，都知我哋会攞佢身上面一啲素材嚟做歌，我哋从来都唔会逼人去讲任何一啲嘢，佢觉得呢个系一个好好发挥嘅题材，我哋咪去配合。」