借醉向黄沾拜师做徒弟 黄光亮：喺师父身上学识乜嘢叫身教

有「影坛四大恶人」之称的黄光亮因为有一副恶形恶相的面貎，经常演出一些凶神恶煞的角色，但事实上镜头后的黄光亮是一个很有书卷味的人，闲时都会看书，与已故的「一代鬼才」黄沾（沾叔）有一段渊源。

黄光亮早前为陈图安主持的港台节目《安哥同学会》担任嘉宾，言谈间提到原来沾叔是他的师父：「好多人听完之后都会谂，突我系咪走去学唱歌或者填词，但其实唔系，我系喺好细个嗰阵，无端端俾一条友嘅粗口入咗脑，仲要讲得鬼咁好听，嗰个就系黄沾师父！」

他笑说：「呢个人可以有咁多才，但系又可以咁不文，我系深深咁佩服佢，想喺佢身上学到啲嘢，于是咪走去拜师，做黄沾的徒弟，识佢嘅原因，系我同佢喺电影踫过头，都搵唔到机会。点知有一晚，我哋喺酒廊，大家饮到咁上下，我就跪咗喺度，斟咗三杯酒畀佢，当时好多人睇到，佢又醉咗，所以是但就饮咗，佢想后悔都后悔唔到！」他续说：「不过最后乜鬼都冇学，次次饮到1、2点就打俾佢，问佢瞓咗未，师父就叫我上去佢屋企，开支XO饮，到咗有一次知我成日去卡拉OK唱歌，咪叫我试吓唱首歌！」

黄光亮表示当时沾叔叫他唱《问我》，听完之后叫我去学声乐：「佢仲叫我学10堂打鼓，我嗰阵唔知点解，原来师父觉得我一啲节奏都冇，之后又叫我学写字，大家就咁玩好耐。我仲喺佢身上学到好多嘢，试过喺佢屋企 ，突然间攞旧嘢出嚟，咁我真系唔识，咪照直同佢讲，因为呢个坦承，佢叫我得闲去摩罗街行吓，睇吓啲艺术品，睇见锺意就要买，返到屋企摆摆吓觉得唔靓就可以唔要，咁样即系代表你识得欣赏呢啲嘢，知道乜嘢系好嘢，upgrade咗自己，嗰阵真系学咗好多嘢。」黄光亮坦言：「我喺佢身上学识乜嘢叫身教，唔系讲道理、逻辑，俾个方法我自己做，如果我唔去唔做，系根本学唔到！」