【独家】洒狗血演绎《理性与任性之间》 AGA赞炎明熹有心亦有火
2021-09-05 20:15 
AGA（江海迦）最近推出新歌《理性与任性之间》以「make peace for yourself」作为主题，希望每个人都接受自己的过去和不完美，她形容这次演绎更是最洒狗血的一次。至于早前AGA参与《声梦传奇》出任导师，她大赞三料冠军炎明熹有心亦有火，更佩服一班年纪轻轻参赛者的抗压能力。撰文：杜淑霞 摄影：张咏森
AGA搵来林若宁为《理性与任性之间》写词，「我同佢讲好想写『make peace for yourself」呢个topic，点样原谅自己嘅过去，点样接受一啲不完美，或者拥抱一啲痛嘅感觉，呢个系爱情故事，大家set个目标一齐去行，但呢对情侣去到目标望番转头原来变咗两个人，因为追目标时自己都改变咗，冇咗当初最重要嘅初心，系咪做错？有冇后悔？错失咗啲咩？所以叫《理性与任性之间》。」在监制舒文建议下，今次AGA一改以往唱法，「好似好奇怪去形容，呢次唱法系最洒狗血嘅一首歌，哈哈！过往演绎方法比较平和少少，今次我系个主角，好似讲嘢形式去唱，录呢首歌时好攰，录完嗰日唔想做任何工作。」
同Gigi一个星球
早前AGA出任《声梦传奇》导师，她笑言有太多虾碌嘢，「我觉得咁多学员得Gigi（炎明熹）明我讲乜，因为大家同一个星球，做导师系一个挑战，始终我识喺Studio写，识得演绎同投入情感，但第一次去表达咁多嘢，识做未必识教。」她大赞Gigi不单明白她教导，而且吸收能力超强，「唔同人同佢讲嘢都会好似一嚿海绵咁吸得好快，领悟力好高，同埋佢愿意去试，尝试系自信同勇气嚟，仲要喺赛制里面，佢好知道自己把声属性，以一个10几岁少女嚟讲真系好唔简单。佢最可取之处，譬如我哋将《命硬》改编嚟唱，而上一集好多人质疑佢咬字，于是我介绍佢畀舒文识，大家喺Studio执咗好耐啲咬字，每句逐只字执到唱啱为止，其实佢第二日8点要考试，但系佢话唔紧要唱埋先、学埋先，呢个咪个火、个heart罗！去到最后五强绝对唔系侥幸，每个人都努力，但系心理质素同抗压力令到佢哋行到去最尾，所以好戥佢哋开心。」
最新回应