苏桦伟妈妈：无悔有呢个仔！

　　(星岛日报报道)今年39岁的苏桦伟，曾6次为香港在残奥夺金，赢得「神奇小子」称号。回想出世时苏桦伟因患上黄疸病，徘徊生死边缘。医生曾劝苏妈：「唔抢救佢，你仲有机会生多个！」但苏妈却咬紧牙关，坚持将孩子从死神手中抢回来。「我屙出嚟㗎！佢成条生命喺度，有血有肉，你嗌我唔抢救佢？完全唔会谂放弃佢，母性嚟㗎！」庆幸当年悬崖勒马，造就了今日的「神奇小子」，苏妈总算苦尽甘来：「好彩我冇放弃佢，今日畀咗咁多光荣我！」

　　改编自残障田径运动员苏桦伟的电影《妈妈的神奇小子》，自上映以来，赢尽口碑，票房冲破1,200万元。在戏中饰演「苏妈」的吴君如，日前亲自访问现实中的苏妈，君如大赞对方是「伟大母亲」，更直言：「其实我每次同伟仔出去场合，我都有啲负担㗎！如果我哋好似特别关心佢，又系另类歧视。」

　　因为一场黄疸病，导致苏桦伟脑部受损，后来更出现四肢痉挛、严重弱听等并发症。伟仔的成长路，注定比一般人难行，在他身边守护着的苏妈感受至深。「高高低低乜嘢都经历过，好多平常人经历唔到嘅我都去经历，依家终于都苦尽甘来，起码我依家两餐唔使忧，两个仔又对我好。」

　　一路走来，唔少「有心人」伸出援手，昔日苏妈含辛茹苦凑大伟仔的「神奇」故事，今日被搬上大银幕，在首映礼上，苏妈希望邀请的嘉宾名单水蛇春咁长，身旁的君如都笑说：「我哋首映冇咁多飞㗎！」

　　「因为呢啲人系帮过我，喺经济上当我好唔掂嘅时候，好似我去两次奥运，北京同雪梨都系四伯爷畀钱我去，老实讲真系唔话得，人哋嫌钱腥咩？我都唔知点报答佢……曾经有好多人帮过阿伟，我唔系擦鞋呀！冇刘德华，佢个名唔会咁响。」

　　曾经被社会边缘化的残障孩子，今日在田径场上「跑得比任何人都快」。捱过艰苦的半生，苏妈一讲到儿子的成就，就一脸满足。「我都无悔有呢个仔㗎！虽然系辛苦……我觉得佢喺08年北京奥运攞咗金牌已经完晒梦，佢今生完全冇后悔，金牌同世界纪录都攞咗咁多……伟仔，你真系今生无悔，我为你骄傲！」