【独家】约朋友行日本市集 86岁罗兰姐开心试茶叶

86岁的罗兰近年系咁出席老友丧礼，如李香琴、谭炳文及廖启智等，每次受访罗兰姐表现都相当难过及心痛，但生老病死从来冇得避，好健康嘅罗兰姐亦活在当下，继续享受拍剧同拍戏，播映中嘅TVB剧《七公主》佢都有份拍㗎。日前下午，罗兰姐现身荃湾一酒店嘅日本小市集，冇得去旅行，去市集行吓当去咗啦。采访:谭壹致

虽然已经86岁，但罗兰姐仍然活跃演艺界，会拍剧又会出吓活动，中气十足行路亦好稳。当日佢同几个中年朋友去咗荃湾某酒店的日本市集，市集有好多嘢卖，有茶叶、有坚果、有零食、有腌制食物、有各式日本饮品，总之全部都放得落口，档档都试食嘅话应该都几饱。

罗兰姐当日同朋友去到市集先试茶叶，见佢拎咗几款茶叶慢慢闻，闻完再试饮，饮咗几杯已经拣到心头好，之后再试啲日本养生坚果，试完几款再入手，有茶饮有坚果食，食住等好快就可以去到旅行。虽然戴晒口罩，但戴咗眼镜嘅罗兰姐实在太容易认到，好多档主同客都有同佢打招呼，罗兰姐亦有点头回应，罗兰姐同朋友喺市集逗留近一个钟，全程表现开心，同朋友又好好倾，表现相当快乐。