【独家】激赞Edan AL 想以《大叔》班底拍惊栗片 黄德斌求创新开公司搞制作

一套《大叔的爱》除了令Anson Lo（AL）和Edan红上加红，亦令黄德斌由靠Man爆型佬变成少女味劲可爱的「KK」，同样冧掂一众剧迷，入行33年的他亦始料不及。剧集和角色受欢迎，德斌未有打算继续食老本，正如他多年来keep住做运动，近年爱上跑山兼食素，全因他想进步，以最佳状况演绎每个角色，未来他更加不满足于演员岗位，计划做老板搞公司亲自参与制作。58岁状况和心态依然fit到爆的德斌，比起「KK」又有另一份吸引力，学他赞「田田」Edan一样，杀死人咩！撰文：杜杜 摄影：梁有财 服装：On Running

德斌最初抱住探索心态接拍《大叔的爱》，对于外界形容演绎的「KK」少女味劲可爱，他带点尴尬笑着话，「难啲想像啦！不过当时导演都有话试吓少女啲咁样，我就朝住呢个方向谂吓究竟少女系点样呢！？」虽然德斌搵到处理方式，但连观众都睇到哗哗声，作为当事人去演绎，他承认都有骨痹感觉，「一定有！始终系麻甩佬一个，做呢啲自己都有啲麻痹嘅感觉，但系最紧要观众开心！」观众睇得最肉紧是「KK」摩天轮下向「田田」示爱一幕，对于德斌来说也堪称「骨痹之最」，「已经系极度，对住Edan咁样又攞住扎花，再咁情深咁讲『你等我』去表白讲『I Love you』，对我嚟讲都唔易㗎！」



继《太平纹身店》跟姜涛饰演父子后，德斌再跟MIRROR成员合作，他大赞Edan和AL是可造之材，特别是对手戏劲多的Edan，「佢哋好勤力，亦都好谦厚嘅演员，我啱啱接触Edan同Anson觉得佢哋唔系新人感觉，最初我哋三个同导演一齐读个剧本，见佢哋有啲感觉出咗嚟，一定好畀心机去睇个剧本，唔系嚟到就咁读就算，佢哋有做呢个第一步系好嘅开始，到真系拍佢哋真系上身咁，喺一啲新秀里面我觉得系可造之材，观众亦会喜欢佢哋，佢哋自身个性格都系可取嘅。Edan好勤力，好集中，又唔会有咩介怀、包袱，佢乜嘢都可以尝试去做，待人接物又好，佢个人冇乜所谓，性格几好，同埋佢又开心嘅，内在佢又系大学生，佢文静嘅时候又可以弹吓琴，杀死人咩！」

靠跑山食素keep fit



《大叔》受欢迎，令德斌跟同剧演员一样狂接广告，虽然他未肯透露实则进帐，但他深明见好就收，扮「KK」不能扮一世，「通街都『KK』都会觉得好奇怪，都要睇吓适唔适合。」对于《大叔》拍续集或电影版，德斌态度亦一样，「我唔希望重覆，要有一啲令到观众有啲唔同感觉嘅嘢先得，如果观众喜欢可以系呢个组合台前幕后做另一样嘢又得，可以试吓惊栗片可能出嚟都几好，唔知㗎！」不过《大叔》令德斌最大转变就是够胆作新尝试，「我系咪可以谂多啲其他嘢，可以畀自己信心试多啲唔同嘅嘢。」原来德斌已计划多时做老板搞制作，「公司就一定想搞㗎啦！跟住会搞啲乜嘢会搞边部份就系未知嘅，仲喺度倾紧研究紧，睇吓做到啲咩出嚟，希望搵多啲人合作吓，希望可以做到一啲嘢出嚟。」



心态决定境界，入行33年58岁的德斌一直靠做运动keep得劲fit，他解释：「我做运动都系希望能够令到自己体力keep住，应付到我嘅工作。」近年他放弃跑石屎路迷上跑山，「因为训练嘅嘢多啲，可以专注啲放松自己，唔好谂日常嘅嘢，集中嗰个moment专注去跑或者行，可以放空多啲，因为山路有树路有楼梯，又有石唔同路况，凹凹凸凸嘅路段，就算日日跑都会有啲唔同，同埋凹凹凸凸嘅路段，会锻鍊到微细肌肉，反应对我嚟讲好重要，演员有啲动作戏会有啲反应唔可以慢咗，人体好得意你唔郁佢有啲嘢会自动消失，𠵱家环境咁多世纪疫症，更加要提高免疫力，做多啲运动对你身心平衡健康都好。」除了运动，为令身体更好，德斌两年前转食素，「见到一啲攞晒奖嘅运动员，都系食素，我又好奇地试吓，佢哋觉得表现更加好，又冇咁多炎症，我自己食咗之后真系冇咁多腰酸背痛，跑完步攰，第二朝好快复原。我会食返多啲豆、薯仔、蕃薯，蛋会照食，我唔系食全素。」