藉新歌MV向亡友倾诉 姜涛哭崩灵堂

姜涛推出年度第二支个人单曲《Dear My Friend,》，坦言希望藉著歌曲，为已故挚友（花名：中峰）献上最后的一封信：「《Dear My Friend,》系为咗纪念一位离开咗嘅朋友，歌名亦都系我谂嘅，好想话畀大家知，呢首歌系专属于佢；希望大家听歌嘅同时，可以望下身边嗰位最亲近嘅人，好好珍惜佢哋。」

故人玉树长埋，作为好友的姜涛虽然有意以歌悼念，却坦诚起初一度采取「拖字阙」：「可能唔想面对朋友已经离去嘅事实，所以当初喺拣曲方面拖咗好耐，而且喺一时三刻亦好难搵到一首好称心嘅歌，最后听到林奕匡写嘅呢只歌，一听就有命中注定嘅感觉；至于填词方面，因为林若宁老师系一位好擅长描写故事嘅作词人，所以我同监制Edward讲，方唔方便搵林老师听下我呢个故仔，睇下佢有乜感觉，然后就促成呢件事。」

日前姜涛为《Dear My Friend,》拍摄MV，特地走访机场、篮球场、表演场馆等多个拍摄地点，当中最令他难忘的场景，绝对是灵堂一幕。自认哭点高的他亦不禁眼角失守、泪洒当场：「导演希望我写一封信畀呢位朋友，然后喺灵堂读出嚟，但系我写唔出，因为我有太多说话想讲，所以我建议乜都唔写，由得我自言自语。因为呢段时间好忙，我想藉著呢个机会，同佢好好倾偈，所以封信只系道具，其实喺MV入面我都系同佢分享我嘅近况、佢屋企人嘅近况，讲讲下就喊咗出嚟；另外因为制作组预备咗一副假棺材，完咗嗰场戏之后，我都一直望住个棺材系咁喊。」

那些年的少年因篮球结缘，为纪念识于微时的珍贵友情，导演特地加入不少篮球元素，姜涛亦亲自拆解多组神秘密码：「因为我呢位朋友系做飞机维修师，所以我哋突登喺机场隔离拍摄奔跑场面，起初仲想拍埋飞机起飞，寓意佢嘅离开，可惜最后因为落雨拍唔到。」提到MV后段以卡通形式呈现好友，营造二人在篮球场对望的画面，姜涛坦言：「真系根据佢嘅衣著打扮嚟塑造，对我嚟讲感触好大，虽然我唔知佢依家系以乜嘢形式存在，但系我希望佢可以喺呢个MV出现，我相信当下我系同佢对视，亦都希望佢睇完之后可以安息。」