维港会｜「重剑一姐」江旻憓文武全才 钢琴古筝芭蕾舞读书样样叻

香港健儿昨天在东奥连夺两铜，全城瞩目，但其他香港运动员即使无牌，一样表现出色，令人刮目相看。好似重剑一姐江旻憓（Vivian），失落奥运奖牌，但仍然有好多粉丝锡佢，近日不断将佢嘅威水史放上网，原来赛场上剑艺非凡嘅佢，场下仲系一名可爱教主，更加超级多才多艺，网上疯传佢同一队弦乐四重奏演奏《明天，你好》，好治疗心灵，令人佩服呀！

Vivian除咗打剑叻，原来仲系多元化发展，动静皆劲，识打跆拳道，又弹古筝、画画同埋跳芭蕾舞。学业亦威水，Vivian之前休息养伤嗰阵，自己喺网上攻读中国人民大学法律硕士，今年喺中大攻读法律博士。

文又得，武又得嘅Vivian，估唔到钢琴都有演奏级，佢同Cong Quartet合奏嘅《明天，你好》，近日就喺网上疯传，好多人like。佢喺片中分享，自己三岁嗰阵被妈妈迫学琴，细个练十分钟就唔想弹，但反而愈大愈嚟锺意弹琴。Vivian话，每次剑击比赛前最想弹琴，除咗纾缓压力，仲有助佢练习人剑合一。