【独家】对唱歌表现仍未满意 陈柏宇拜师提升技巧

陈柏宇（Jason）最近推出全新专辑《53FPS》，专辑碟中加入Jason锺爱的电影元素，不过早前Jason为铺排宣传新碟，专登清空社交平台，一度令fans误会偶像出事，Jason也始料未及。被外界封为「隐世高手」的Jason，原来对自己唱歌表现仍未满意，大半年前竟开始搵老师学唱歌提升技巧，新碟可睇到他的转变。撰文：杜淑霞 摄影：谭壹致 发型：Alex So@ The attic 化妆：Jessica Chan 场地：Room53 丁方体验房

Jason解释专辑用《53 FPS》是有特别意思，「『FPS』系拍摄电影时候用到嘅格数，我哋起初讨论呢只碟嘅时候，因为我自己好锺意睇电影，希望喺今次专辑音乐入面表达到嗰个电影感，而『53』就唔系平时拍摄时用到嘅格数，用呢个数字系想喺呢个框架里面做一啲独特啲嘅嘢，又可以属于自己嘅嘢，用5同3系我第一张专辑推出时就系5月3号。」

清空ig吓坏fans


为了配合这次新碟宣传，早前Jason专登清空ig，但这个突然举动却引起fans好大反应，「我都唔知点解会吓亲人！（有冇谂过会咁？）冇呀！对我嚟讲又唔觉得改变某一啲嘢去做呢件事，只不过系用咗一啲以前冇用过嘅方法去做，无论喺制作专辑或者宣传专辑呢件事入面。」



宣传方法改变外，专辑中大家还会发现Jason的音质或者唱法上的转变，因早在大半年前他在小肥推介下，搵了同样的歌唱老师Guddy学唱歌，「搵老师之前自己都有上网自学咗两、三个月，之前跟过不同老师，但唔系一段长时间，可能之前都冇咁嘅悟性去谂唱歌系咩一回事，都系偏向做到，享受就得啦！但系疫情期间太多时间去谂吓嘢，去思考吓嚟紧日子里面，喺呢个行业仲想做到啲咩，就去学唱歌，呢个年纪同呢个经验去学都有着数喺度，但都系好迷茫，因为唱歌系件好抽象嘅事，但系就会好过我早5、6年前心态，经验多咗自己好清楚自己想要啲咩。」自言现在唱歌信心大了的Jason，但仍未敢孭起「隐世高手」，「都系人哋称呼，因为我自己唔系咁睇，我一向都知自己唱歌嘅能力去到边度，唔系外界觉得嘅嗰个能力。」