【独家】返港赚钱两个月回归苏格兰 乔宝宝开心宣布8月抱孙

3年前见证住大仔「印度豹」娶医生老婆嘅乔宝宝讲明恨抱孙，乔宝宝为咗尽快达成心愿，每逢周末就同太太及细仔去妹妹间餐厅帮手兼小住，让两公婆可以过吓二人世界！宝宝用心良苦下终于有成果，刚离港的宝宝向本报报喜，兴奋表示8月中将荣升爷爷，乔家将四代同堂，认真恭喜晒。采访：方骞平

移民苏格兰的乔宝宝返港两个多月后已打道回府，离港前夕契姐黑妹姐(李丽霞)为他搞咗个小型栈别宴，兼且为Joe Junior祝寿，郭秀云仲带埋罕有嘅灰鹦BB女贺寿，Joe哥好开心多谢黑妹妹！郭秀云指Joe哥系50岁生日，而基哥(李龙基)同Joe哥齐齐报喜，表示两人分别喺9月及10月开演唱会。

宝宝想男女孙都有
不过，全场最欢喜莫过于赶住返屋企等抱孙嘅乔宝宝，他开心说：「我恨做爷爷好耐，有咁好DNA，不时催促佢哋快啲生，因为妈咪想更上一层楼(四代同堂)。我冇问系孙仔定孙女，我叫佢砌过好字出嚟，最少都1男1女，如果第1个系女，第2个咪搏吓仔罗！第2个系女咪搏到仔为止罗，我要做十兄弟姊妹爷爷！讲吓笑啫，其实今时今日生两至三个就够，𠵱家冇重男轻女，不过，至少破到我得『两件』纪录呀！」黑妹姐说：「呢3年宝宝走咗我有少少冷同寂寞，因为冇人喺身边讲笑，佢玩法似擦鞋仔咁，每次我都好唔舍得佢，记得第一时间畀张孙BB相我呀！」宝宝乘机引黑妹姐笑，他说：「我细个嘅愿望就系做可以上到市嘅擦鞋仔！」吓到黑妹姐马上修正擦鞋仔说法：「其实细佬氹得我开心啲，甚至有朋友话我哋愈嚟愈似样，唔好玩啦！」