Tyrese提出解散转行做园艺 天堂鸟准备举行最后一次演唱会

BOP天堂鸟日前接受许文轩主持的TVB娱乐新闻台节目《StarTalk》，大谈组合将解散以及举行演唱会感受。成员Tyrese向其公司及队友提出解散，他说：「我哋冇不和，完全冇嘢！其实之前有段时间组合有官司，已经有解散念头，之后转投新公司，谂住有希望，重新出发，但疫情令我哋却步，所有嘢停晒！我哋都三十岁，要维持自己生活，就要搵出路。」他坦言做娱乐圈以外的事较容易掌握，现在主持做园艺生意，他说：「畀我嘅满足感同幕前唔同，例如我拎条桥出嚟，立即有嘢返，所以好享受。(金钱容易返？) 哈哈，唔使讲到咁白。生活轻松咗，过去成日都担心生活费，已经舒服咗，而且畀到另一半安全感。」

Gordon直言分开发展属好事，他说：「呢七年大家太依赖大家，分开发展可以令大家更认识我哋每一位成员。其实今次演唱会我哋都等咗好耐，既开心但又伤感。因为可能真系最后一次！呢排预备演唱会同埋之前参加《盛•舞者》都搵返跳舞嘅初心。呢七年自己有偶像包袱，参加完比赛后放下咗偶包，唔介意企喺人后面Support队友，其实跳舞就应该系咁。希望可以带《盛•舞者》嘅队员上我哋今次演唱会舞台。」

近期忙于拍剧的Lincoln说：「其实未入BOP之前，我系演员出身，原来自己已经放低咗做演员八九年，近排拍剧搵返演员嘅初心，越嚟越锺意拍剧。今次拍《爱上我的衰神》有好多第一次，包括初吻！」