【独家】带新女直击布吉岛通关情况胡慧冲赞「布吉李嘉欣」唔怯场

2021-07-17 01:33

泰国政府宣布7月1日起于布吉岛推出「沙盒计划」，畀已接种两剂疫苗嘅低风险国家或地区旅客，抵达后唔使隔离。作为居泰港人嘅胡慧冲(Roger) 第一时间带埋外表甜美兼有火辣身材嘅新拍档「布吉李嘉欣」飞去直击。采访：方骞平

「泰国通」胡慧冲由《冲由泰国》开始跟32C冬荫妹拍住上做旅游节目，Roger强调唔系贪新忘旧要换新女，只系冬荫妹冇期参与，而布吉妹英文都ok，对住镜头着泳衣，大晒33C、26、36身材都表现自然冇怯场，网民畀晒like。问到同冬荫妹比较边个索啲？他大笑说：「呢个问题好敏感喎，两个各有千秋啦！布吉妹有新鲜感啲，个样系甜嘅！」

四围去唔怕染疫
今次胡慧冲应泰旅局邀请到布吉岛做宣传推广工作，去咗7日6夜，期间影吓当地靓酒店、米芝莲一星餐厅、Spa、街头小食及当地最新民生情况等。他无奈说：「因为疫情关系，有啲店铺执咗笠，但都有新嘢补充，而且阳光与海滩及低消费，对欧洲旅客有一定吸引力，至今反应算系几理想。其实今次计划对泰国政府嚟讲系大胆尝试，始终打咗针唔代表系百毒不侵，但布吉岛好靠旅游业，唔可以再坐以待毙。」

另外，7月15号苏梅岛重开，泰国其他省府亦会逐渐开放。游客渐多，问到Roger可会担心染疫？他自言时运高：「呢年几都冇停过去拍嘢，乜高危地方都去过晒，甚至有次去剪完头发，隔咗两个礼拜发型屋经理打嚟问我身体状况？原来当日帮我剪头发嘅师傅中咗招，当日我仲冇戴口罩，佢就有戴，但冇传染畀我，可能我做得善事多所以咁好彩啩！」