【独家】乔宝宝多谢Do姐当年畀机会 《造星III》叶小妍比赛再被狠批

31岁嘅魔乐师叶小妍喺ViuTV《全民造星III》被淘汰，因为爆喊唔肯离开舞台获评判卓韵芝嫌弃回应：「唔好啦！」最后花姐要停厂请她走。被网民狂负评的小妍日前再换上战衣参加《MEGA VOICE》歌唱比赛，最终都系因为走音、甩bit被评判叮走。采访：方骞平 摄影：谭壹致

为咗发掘更多年青人加入乐坛，千亿电影制作公司就搞咗个靓声歌唱比赛，上周五15位参赛者展开第一round淘汰赛，当晚乔宝宝出任司仪，黑妹姐、苏珊等担任评判。于《造星III》被淘汰的「骑呢」叶小妍唱出自家创作新歌，不过继续甩bit、唔啱音乜都齐，难逃被叮命运，黑妹姐见她勇气可喜，客气地赞她造型唔错。苏珊赞完衣著后即狠评她音域、咬字、拍子都唔准、歌词又唔熟，唔知唱乜。小妍面懵懵陪笑，临走前问乔宝宝：「你可唔可以教我英文？」

会参加《造星4》
叶小妍话自己成长咗，可以放松面对得失，所以今次一啲都唔紧张：「人有三衰六旺，跌得快会起得快，有起有跌先可以丰富人生，不过当日畀人形容骑呢系有啲唔开心，甚至有黑粉留言话我样丑，叫我跳楼死，其实佢哋先惨，无聊到要闹一个唔识嘅人！」虽然被网民闹，但小妍认为娱乐圈有声音系好事，起码会有人记得自己，她更扬言会挑战组女团的《造星4》。至于乔宝宝因为同该电影公司老板翟俊威好老友获邀做司仪，今次活动勾起当年参加《残酷一叮》回忆：「最好彩喺舞蹈上攞到好多同情分，尤其跪地动作，Do姐话睇吓我会搞乜，因为咁赢咗两秒有机会入咗娱乐圈几十年，真系好多谢Do姐。」