【独家】识唱姜涛Edan嘅歌唔怕OUT 关心妍将「关家姐」咒诅变祝福

2021-07-05 22:19

下年41岁的关心妍（Jade）趁出道20周年重返乐坛，Jade强调性格如新歌《腍》一样，绝非传足10几年的陈年潮文，女网民口中虾虾霸霸，留难及投诉售货员，搞到网友家姐被炒嘅「关家姐」，今时今日，Jade对「关家姐」仍有话说：「我惟有将咒诅变成祝福，多做善事俾人睇到我唔系嗰种人。」采访：方骞平摄影：谭壹致场地：The Fleming

关心妍推出3首新歌《腍》、亲自作曲编曲和监制嘅《爱的告别式》及《原谅的力量》，凭歌寄意，写下对已故父亲嘅恩怨情仇。当年爸爸不负责任离开关妈妈及一对子女，直接影响咗Jade的婚姻及爱情观，好怕似妈妈咁，一个人搵钱照顾两个细路，直至遇上老公杨长智才令心态改变，她sweet爆说：「佢唔系一个普通嘅男人，佢似爸爸咁照顾我，提我带叉电机、消毒机，仲会帮我吹冻食物。」

当年关妈妈要返港搵食，安排两兄妹喺加拿大求学，长期冇父母照顾，Jade俾人虾到癫：「好记得中学时喺学校俾人偷咗钱，同校长讲又点？都冇人back up，出声都嘥气，所以愈变愈腍，细个时好冇安全感，好嬲爸爸㗎！所以《腍》呢首歌有我嘅特性，只系唔了解我嘅人，俾『关家姐』影响咗对我嘅睇法。段潮文俾人闹足10几年，提醒自己多行善，畀真实一面大家睇。」另外，Jade好感恩仲有公司欣赏她搵她出歌，她唔怕时下乐坛新人辈出会out咗：「音乐冇分年龄界限，最重要有诚意，我有同陈泽言（CY）喺音乐上交流，哈！我识唱姜涛嘅《蒙著嘴说爱你》、Edan嘅《E先生连环不幸事件》，有机会仲想同林家谦、陈蕾、Serrini合作。」