【独家】《辉哥为食游4》邀星级嘉宾助阵 吴锡辉70大寿低调庆祝

吴锡辉主持的《辉哥为食游4》最近播出第4辑，疫情下拍摄唯有改变策略邀请多位星级嘉宾，包括甚有渊源的罗家英和米雪助阵。7月便70岁的辉哥，虽然跟太太邓蔼霖及长子因疫情分隔港英两地，幸有细仔及一班老友跟他庆祝，同时亦是他一手成立的「香港电台第二台」40周年纪念，更加别具意义，而他亦很安慰看到近年MIRROR及ERROR冒起炒热香港娱乐圈。撰文：杜淑霞 摄影：张咏森 场地：Happy Valley pub n restaurant

今辑《为食游4》搵来的星级嘉宾除了吴镇宇、黎耀祥和张德兰外，还有跟辉哥相当有渊源的罗家英和米雪，原来前者是旧同事后者是学生，「我喺（港台）二台啱啱开始，罗家英喺第五台同李宝莹做《梨园之星》宣传粤曲；而米雪喺佳视做花旦要卒学去补习，我嗰时啱啱喺港大毕业读英国文学，日头喺新法书院教英文，夜晚就去静宜女中帮刘家杰手教，Michelle就系我班嘅学生。」

乐见MIRROR ERROR炒热娱圈


辉哥谓太太邓蔼霖陪长子在英国居住，今年只能跟细仔撑枱脚庆祝70岁生日，「细仔同我讲咗，7月10号安排好，佢会买牛面珠墩肉用红酒炆再加意粉，我叫佢买多条法包沾汁食，饮吓酒我就够。（冇得同大仔太太庆祝？）都冇办法，遥远祝福罗！」爱饮爱食的他仲有班老友庆祝，「我哋有个group叫『传媒老是佛』有14个人，我反对生日大锣大鼓，但曾智华个搞屎棍提起，唔通人哋话庆祝我咁扫兴咩。」另外张文新提起由他1981年创立的「香港电台第二台」刚好40周年，他亦会跟旧同事聚旧，「我哋神秘地约咗个神秘地点，去开一个神秘party，会跟足政府嘅限聚令。」


70年代加入电台的辉哥，看着广东歌兴衰，对于这两年新一代歌手努力，他特别感触，「我心里面系感动嘅，细路搏得就搏啦，佢哋咬实牙关，MIRROR或ERROR都好，佢哋都捱咗3年呀大佬！你估金仔（金广诚）鲁晖（鲁庭晖）冇做嘢咩，人哋畀咗3年花姐慢慢tune，我好appreciate起码佢做嘅嘢有晒部署，我当然恭祝佢成功啦！我个港台旧同事系前新闻部总监，嗰日食完饭佢唔系返屋企，走去睇姜涛生日会，阿婵都系姜糖，我个心有丁点儿老怀安慰。」