【独家】周柏豪认叻冧老人家最掂 阿Sa自爆心软兼好易𠱁
2021-05-06 18:47 
阿Sa（蔡卓妍）与周柏豪继17年电影《原谅他77次》后，原班人马再度合作新戏《感动她77次》，今次更加入泰国靓仔演员Mario
Maurer饰演两人之间第三者，阿Sa坦言跟对方以英语演戏有一定难度。讲到感动，阿Sa和柏豪自认心软兼好易𠱁，不过亦好叻𠱁身边人开心，两人特别擅长冧老人家，婆婆和嫲嫲成为主力受惠对象。撰文：杜淑霞 摄影：李维隆 场地：Hyatt Centric Victoria Harbour Hong Kong
阿Sa和柏豪在《原谅》以嗌交为主，今次则要深情戏居多，但阿Sa未被大量喊戏难到，而是被英文对白考起，因要跟泰国演员Mario对戏，「我要同佢讲英文，我又做律师，讲好难嘅术语，今次真系狂NG，实在太难讲啲英文字，平时沟通简简单单都话冇乜所谓，拍戏你要好字正腔圆，Mario都好好，佢知我母语唔系英文，有时NG好多次，佢都唔会唔耐烦。」
讲到现实中被感动，阿Sa自爆好易𠱁，「我系极度受软唔受硬，你用软招就死啦！但唔系求其讲『我好爱你』就相信，当我感觉你系真心去讲或者为我做啲嘢，我就可以畀晒啲嘢你，攞去！（死穴？）屋企人同埋朋友，可能我冇兄弟姐妹，爹哋妈咪离婚，我好细个惯咗要人哋对我好，要对人哋好好先。」自认极度心软的柏豪，死穴就是屋企人，「为咗屋企人好多嘢都可以牺牲，好多嘢可以唔理，最紧要佢哋开心安全健康。」
两人又话好锺意𠱁人开心，阿Sa说：「我唔系专登感动人，但系非常锺意𠱁人开心，我要对人哋好好，咁我就会赚到人哋对我嘅少少好罗！所以我唔介意做任何嘢。（最锺意𠱁边个？）我阿嫲好易满足，90几岁好劲，佢好搞笑，我嘅乐观系遗传自我阿嫲！」柏豪以往最锺意𠱁已离世的婆婆开心，但原来他跟戏中角色一样冧外母好了得，「同角色一样几岁到八十岁嘅老人家都锺意我（阿Sa：几岁嘅老人家！）哈哈！几岁嘅老人家到几十岁嘅小朋友我都搞得掂，现实生活我都觉得自己系咁。」
最新回应