【独家】花姐凑仔苦与乐（三）之 为姜涛开心又担心

花姐（黄慧君）继续同《头条》讲凑MIRROR和ERROR苦与乐，睇完2018年时花姐对一班囝囝的期望，是时候讲返现在「凑仔」感受。花姐由监制转型兼任经理人已经两年半，虽然愈来愈大压力，但原来亦有所得着。花姐对一班囝囝有几用心有目共睹，她心中目究竟边个仔最令她开心、放心、窝心、担心及伤心呢？当中姜涛竟然令她最开心亦最担心！撰文：杜淑霞 摄影：谭壹致

花姐做了MIRROR和ERROR经理人一段日子，究竟她会如何用一句说话来形容感受？

花姐说：「虽然好行，但真系好似过山车！我由细到大条路都好稳阵，19岁入行，慢慢上，每到一个位就有个高人话畀我听要点样行，估唔到45、6岁突然由comfort zone去到另一个位做嘢，一开始好沮丧，但见到佢哋成长、得到认同、fans支持、得好多奖、啲客见亲佢哋都好开心，系令我开心，但起跌实在太大。Anson Lo（卢瀚霆）同我讲『你可唔可以唞吓！你咁样真系会黐线！』我一瞓醒就系run MIRROR同ERROR嘅嘢，过程系好开心，畀我再拣都会拣呢条路。原来做经理人咁艰辛，我以前对啲经理人会反佢哋白眼，觉得佢哋好麻烦，我要同佢哋道歉，知佢哋点解咁麻烦。（好大压力？）系，每样detail要做得好，因会影响佢哋。（考你EQ？）我EQ低好容易发脾气，但做经理人后，佢哋唔觉意教识我，好多嘢要从唔同角度去睇，令到我改变，𠵱家最少唔会乱发脾气，呢个对自己最大得着。」

花姐觉得最令她开心的成员及事件？

花姐说：「姜涛攞咗『我最喜爱男歌手』同埋『我最喜爱歌曲』，我开心唔系因为佢攞两个奖，系跟住佢上台唱《蒙着嘴说爱你》冇事，跟住大家觉得佢唱《蒙着嘴》都唱得几好喎！」

花姐觉得最令她放心的成员及事件？

花姐说：「阿Jer（柳应廷）从我决定畀佢单飞，我系好担心，我记得畀佢入MIRROR时，嗰阵有班委员拣咩成员入呢个男团，阿Jer有少少反对声音，阿Jer亦唔想入男团，阿Jer继续喺呢个男团冇单飞嘅话会好坎坷，阿Jer根本就唔适合男团，我搵佢系因为觉得佢把声好好听，佢应该入行，又可以帮到当时MIRROR，MIRROR唔系好多人唱到歌。仲记得上次开演唱会，排练时老细坐我隔篱，我同老细讲『我哋签个男团OK，你望唔望到嗰个阿Jer，畀多啲投资我，你信我3年后佢会系陈奕迅』好得戚！谂起心都寒埋。到𠵱家我说服到鲁生（高层鲁庭晖），佢系认同佢嘅实力，认同我哋签呢个artist系冇错。」

花姐觉得最令她窝心的成员及事件？

花姐说：「窝心好多，我哋其实好有爱，佢哋做嘢有少少唔认真就会激嬲我，我就会黑面全日唔讲嘢，佢哋𠱁我方法就系全部人一齐唱生日歌，我忍唔住笑佢哋戅居，跟住我哋当无事发生，呢个系组里面传统。有次唔系佢哋激嬲我，我私事唔开心，突然佢哋逐个逐个走埋嚟唱生日歌，佢哋12个一齐做呢件事系好暖嘅，好庆幸我去到人生中段可以遇到呢12个男仔，多咗12个仔。（ERROR好少激嬲你？）佢哋少，好记得佢哋有次安慰我，拍《ERROR游2》我同MIRROR做啲嘢先飞，点知MIRROR激嬲我，我好唔开心跟住第二日飞，去到拍第一个游戏就系你哋成日睇，我畀佢哋弹落水，落到水我受伤呼吸唔到，挞落水痛到喊，嗰个喊唔纯粹系痛，系觉得点解要咁委屈，做经理人啫！阿Dee（何启华）就走埋嚟揽住我，呢个shot都有出街，佢哋都知我唔开心，揽住我喊发泄完就冇事。ERROR唔使凑，系ERROR凑我㗎！肥仔（梁业）又会冇咩事打个电话嚟，『花姐有冇咩事，有嘢就搵我啦』呢啲都好窝心。」

花姐觉得最令她担心的成员及事件？

花姐说：「第一个担心系姜涛，佢𠵱家万千宠爱，之后个人变成点，好影响以后嘅路，总之做嘅嘢啱晒，佢𠵱家唔系咁，但好容易变成咁，好彩佢以前系肥仔，同埋佢妈咪管教得佢好好，男仔廿几岁都咁纯。我会经常提醒佢，你要谦虚，唔代表你得到嘢唔需要努力。（旧年攞咗咁多奖，你会唔会心理辅导佢，下年呢啲奖未必再系佢攞？）佢最想要嘅唔系奖，最想我畀自由度佢做自己锺意嘅音乐，畀好大投资佢拍锺意嘅MV。佢锺意嘅唔系好主流嘅音乐，佢会觉得『你都听我锺意嘅音乐，多过你畀个奖我』，姜涛同我有同一个理念，佢好想用佢嘅影响力去带多啲唔同种类嘅歌畀大家。」

花姐说：「我担心Anson Kong（江𤒹生）好矛盾，我锺意佢嘅直接，唔锺意就话你听唔锺意，好开心就会癫咗咁开心，好锺意佢呢种真，但又令我有啲担心。（叱咤颁奖礼有好多声音？）系有好多声音话佢『妒忌人哋』，我见到佢个样我都好担心，大家误会佢，我仲听到有啲人话『你成日利用所谓嘅真，做乜都得咁样』但系唔系一啲咁真嘅人先至珍惜咩！？我都好珍惜，但好惊好多人误会佢，令好多人伤害佢，我想喊𠻹！我知呢个仔有脆弱一面，佢系12个MIRROR里面最勤力嗰个，佢有空档就弹结他学唱歌，佢话『我唔拍拖啦！呢几年去做我最想做嘅嘢』，佢应该可以得到更多，但可能性格令好多人批评佢，令佢失去好多嘢，好心痛佢。」

花姐觉得最令她伤心的成员及事件？

花姐说：「佢哋有时误会咗我，『花姐你偏心，冇畀呢个机会我』佢哋迷茫时就成日会做呢啲，我当然会伤心，我知道我唔系，虽然我唔可以畀16个人嘅爱一样，我一定系爱呢16个人，求其一个叫我死都可能去。疫情佢哋冇工开，会觉得系咪花姐帮我唔到，我听到呢啲说话系好伤心，因为自己已经200%帮紧佢哋，佢讲都唔系想伤害我，只系冲口而出，我哋熟到好似屋企人一样，有时都会讲啲说话伤害到大家。不过我哋好快就冇事，因为有睇到我努力，我都有话畀佢听希望点样帮到佢。」