【So Hot】怀孕8个月手脚依然好瘦 沈卓盈拖老公影透视大肚相

沈卓盈（Jess）沉迷玩社交网，事无大小都要放上网同人分享，大肚咁大件事当然日讲夜讲，早前宣布一索得男嘅佢昨日在社交网狂晒喺沙滩影嘅性感大肚相，出完一个Po再一个Po，分别系透视单人照，有全身有半身仲有躺沙滩嘅，清楚见到超完美大肚婆身形，老公仲喺身后揽住佢个肚，Wow，好Sweet。

仲有一套靓Body Suit，Jess露背又露腿，仲拖住老公一齐影，可能富商老公唔系好惯，笑容有啲牵强，难怪佗8个月肚嘅Jess咁自信，因为大肚婆嚟讲，Jess手脚依然纤瘦，五官亦冇走样，靓靓大肚婆无误。

Jess留言大赞老公系最好嘅灵魂伴侣及爸爸，并分享佗B感受，「孕育生命的过程真的很奇妙，令我深深感受到当妈妈真的很伟大，每一周都要留意住宝宝的成长，经历了初孕的不适，胃口的转变，身体的变化，皮肤质素的变差，担心宝宝的发展，时时刻刻提醒自己要吃得健康，也要好好管理因荷尔蒙变化令我们不稳定的情绪，这一切都好不容易啊，但只要听到宝宝一切安好，和感受他在肚里面活跃踢动时候，这些辛苦都不算什么了，这个美妙孕期的变化和过程真的一定要好好记录低，因为当妈妈令我们变得更勇敢呢！」好多字，都系睇返相算嘞。