【独家】疫情下开窍持续做运动叶童强健身体为工作做准备

2021-04-22 23:00

叶童在ViuTV剧《无限斜栋有限公司》饰演卢慧敏（Amy）妈咪，抛弃了对方多年再重遇，虽然戏份唔多，但母女间感情好复杂，戏份少更难演。她大赞Amy做足准备演得好，又自谦冇资格提点一班年青演员。她又透露疫情下工作量大减，终于开窍持续做运动，身体变健康，为未来工作做好准备。撰文：杜淑霞摄影：谭壹致

讲到演绎今次角色，影后叶童竟话被考起，「几复杂几难演，因为篇幅少，但牵涉20年感情，再见返个女时系好复杂，都大挑战，事前准备功夫要做得好，都有睇晒个剧本先去拍。」她又赞戏中囡囡Amy，「佢做得好好，有种清新感觉，佢对妈妈嘅挂念，好憎佢唔理自己感觉，佢都做到出嚟。」讲到提点新人，叶童竟然话：「我冇资格，梗系冇啦！每个角色都唔一样，我又唔系佢个角色，我会辅助罗！都系老一派做嘅嘢，镜头见唔到都喺度，同佢交流番，感觉佢内心情绪未到，会同佢讲多两句我哋之间关系嘅内容。」

叶童坦承疫情令工作量大减，开始多做了运动，「上网睇做啲瑜伽伸展咁，坐得太耐觉得腰骨硬晒，好多年前我有做运动，有一轮停咗，再开始以为好易啫！我做过晒啦！但完全做唔到，又喘晒气出晒汗，先发觉我曾经拥有嘅身体、机能、状态，以为会一直拥有，原来系会消失，于是keep住做（运动）有大半年，𠵱家觉得好舒服啲筋松番啲。」她坦言这是疫情最大得着，「疫情关系，同自己相处时间多咗，开始思考以前冇谂过嘅嘢，譬如：点样对自己系负责任番啲呢？从前好多事都系得过且过，唔系对自己咁好，作为演员好似未认真对待我演员工作，好似身体锻鍊咁样，应该系演员工作嘅一部份，就算唔系开工都应该keep住个身体健康，柔软度都系需要，但我从来都忽略，听日有动作戏，今次先拉吓筋郁吓，成日都系临急抱佛脚，应该系持久地进行，今次我忽然之间开窍，知道原来成为一个演员应该要做啲乜嘢，我希望坚持之下，令将来演出更加自如啲，更加好啲。」