【维港会】英女皇访港藏品升值 一张报纸值几百蚊

英国皇夫菲腊亲王逝世，引起唔少港人缅怀昔日嘅香港，收藏界又掀起搜罗英女皇同皇夫嘅旧物热潮。专门收集本土旧物嘅Select 18店主 Mido话，本地有人专门收藏英女皇同皇夫访港嘅旧物品，尤其附有中文繁体字嘅就特别抢手，好似两人访港期间嘅纪念品，近年炒到好高价，相关旧报纸嘅报道亦升值。

皇夫菲腊亲王去世，享年九十九岁，较年长嘅港人会记得佢，因为佢同英女皇先后喺一九七五年同一九八六年访港，亲民嘅形象，深入民心。呢两次访港期间，不论系港英政府或民间都推出唔少纪念品，好似两人出席宴会嘅餐单，系收藏家必争之物。Select 18店主 Mido话，有关餐单市值几万元，有钱未必买到。至于两人访港嘅新闻报道，一张都值几百蚊。

Mido话，英国本土有好多关于英女皇嘅旧物，但数量太多，又以英文书写，唔系好多香港人收藏，但英女皇伉俪两次访港嘅纪念品，尤其有中文繁体字嘅，好有本土特色，一喺市场出现，就会被人抢购。佢自己家中收藏一个一九五三年纪念英女皇登基嘅铝杯，上面刻上「天佑我皇」四个中文字，非常罕有，几多钱都唔会卖喎！