【独家】转型独立歌手积储快乾塘 何雁诗不排除重返星梦

何雁诗（Step）最近推出新歌《灰够》，以她过往一段惨痛爱情经历做蓝本，当时她曾为对方喊到眼肿，要长期摆定铁匙羹入冰箱用作敷眼，现在已成幸福人妻的她，录音也搞到情绪低落，好彩有好老公郑俊弘呵番。转型独立歌手年多的Step，原来准备推出EP作小纪念后，暂未有推出新歌计划，她直言因已花6位数积储已快乾塘，有意再签唱片公司，更不排除会重返星梦。采访：杜淑霞 场地：Fb eat all day

Step新歌选择以该段情作蓝本，并非因特别深刻，只是太戏剧化，「我曾经有个另一半做咗好多坏事，我一直包庇佢，但睇唔到将来会开心，拖拉咗半年，我觉得嗰种痛系因为离开时仲系好爱佢。嗰段日子长期有堆匙羹摆喺雪柜，因为朝朝只眼肿到爆，如果有时冇羹试过用雪藏鸡翼敷。嗰段时间真系好攰，成日闹交闹到好夜，第二日要拍剧会早两个钟起身雪眼，𠵱家谂番好无谓，初初痛会觉得暗爽嘅，愈痛愈爱，但痛过好多次就会知道斋得个痛，𠵱家唔需要吓吓咁戏剧化，可以日日好简单咁样。」


最初Step搵歌时，讲明要有点K歌feel，令乐迷有机会去爆，唱起来会好爽，她录音时也觉得好正，但录完后竟然要老公郑俊弘安慰，「录嘅时候系好爽，独立之后录得最快系呢首歌，但我预计唔到，呢首歌会带咗啲唔开心情绪，唔系我未忘记呢段情，只系好想爆喊一镬，我老公以前都冇见过我咁样，但佢好愿意听，知道同我沟通会帮到我，我喊完就舒服番晒。」

《灰够》将会收录在Step即将推出的EP内，但她坦承这只EP后，未知几时会再推出新歌，「旧年3首歌加埋呢首够4首出到EP，算系对自己独立后少少嘅总结同纪念，因为都未有计划出下首歌住，虽然写咗啲demo喺度，有啲真系可以出，但资金问题，再咁出爹哋妈咪杀咗我，已经使咗大笔嘅6位数，银行户口真系好乾，我要搵多啲钱先得。」她坦言有意再签唱片公司，跟TVB仍有经理人约的她，更不排除重返星梦，「公司之前都有问过我想唔想，我都唔系太清楚𠵱家星梦系点，有好多嘢慢慢倾，我觉得一间唱片公司最紧要我同佢睇法夹，我最大要求一年出3首歌，之前点解离开就系因为想有多啲作品，我入咗行超过10年，又就嚟30岁，都想keep住有多啲作品，唔系过多几年就30几，可能要生仔，呢几年系要冲，歌星最紧要有歌出，希望有间公司会相信我嘅潜质。」她更自爆为搵钱出卖自私空间，「早前《新春开运王》话要拍我哋屋企，我最初唔想，但系话有两个骚我哋即刻接，几cheap呀！哈哈！」