【独家】教女沙滩片石捉蟹仔　郭富城化身Chok龙友影老婆

郭富城（城城）自拍毕内地电影《我的爸爸不一样》后便一直留港陪家人，早前仲拖太太方媛（Moka）去铜锣湾睇画展，逗留两个钟就「掉低」7位数扫走7幅靓画！未有工开的城城近日尽情享受天伦乐，日前Moka亦于微博晒一家四口春游照。深明身教的重要性，城城陪住两个宝贝女都刻意转玩低消费活动。早前下午，《头条日报》记者撞到郭氏一家喺浅水湾石滩捉蟹仔，其间城城Chok爆表演片石，仲耐心教3岁大女Chantelle片𠻹，之后又踎低帮老婆影靓相，一人服侍3个女人真系忙！采访：张咏森

日前，「城嫂」于社交网分享出游相，除了母女去水族馆睇「Nemo」外，仲晒出「大宝」Chantelle和即将2岁的「二宝」Charlotte同爸爸一齐去捉蟹的温馨照，而当日《头条日报》记者也在场全程直击。当日下午5时许，城城拖住大宝从停车场步行到浅水湾沙滩附近的石滩，而太太与工人姐姐就「的」住二宝紧随其后，唔只两个宝贝以「孖妹Look」，穿公仔白Tee衬牛仔裤、扎孖辫兼戴心心太阳眼镜遮样，郭氏夫妇也一身Sporty Look孭情侣LV袋。

影惯影熟
甫抵达石滩，工人姐姐先帮「小主子」摺起裤脚，Moka即刻低头忙住搵蟹仔，而贪玩的城城就执了几块石仔，并于囡囡面前Chok爆表演片石，拎住个桶仔企喺旁边的大宝睇到眼定定，城城见状即弯腰拣块靓石畀囡囡玩，点知耐心讲解完一轮，大宝接过石仔即「捩」手丢落地，逗得城城哈哈大笑！随后，天王城城又踎地陪女捉蟹，Moka在旁举起手机影花絮；未几众人移师隔离沙滩继续玩，两公婆在夕阳下头贴头Selfie之馀，城城仲化身「龙友」踎地帮坐喺大石上的Moka低炒影靓相，见其手法纯熟，估计都系被老婆训练有素。玩足一小时，临走前城城仲带囡囡去食雪糕，用普通话问囡囡，「要不要吃冰淇淋?」，大女即大声用奶音答，「要。」其间发现记者都主动打招呼，又问记者「要唔要食啲嘢饮啲嘢呀?」真系暖意又窝心呀！

见城城咁Nice，记者上前搲水吹，赞两位囡囡好乖，城城答:「乖㗎。」问囡囡系咪成日困喺屋企好闷所以带出嚟放电?城城好腼腆咁话:「成日都要㗎啦。」之后再问工作问题，佢话而家拍紧广告，筹备紧拍电影，卡士就唔讲住嘞，留心问答环节，城城边答边两手捉住背囊带又脚踢踢，好似小学生放学咁，劲得意。