【独家】Dry足六年　带女食Tea劲过电　43岁伍允龙力沟C Cup金融小花

现年43岁的「大只打仔」伍允龙（Philip）自15年跟拍拖8年的锺嘉欣分手后，先后因拍无綫剧与刘佩玥及江嘉敏传绯闻，可惜两女最终情归他处，不过，单身6年的他近日似乎脱单了！早前《头条日报》记者撞破Philip与年约28岁的金融小花Annissa Choi到铜锣湾食Tea，席间两人细声讲大声笑，男嘅出力狂冧女，有样有胸嘅女方就心心眼嗒晒糖，大家都好有Feel喎！采访：梁志明

感情一直交白卷的伍允龙终于有着落，当日下午约5时，Philip相约较他年轻近廿年、在金融科技公司任职高级销售助理的Annissa Choi，到利园COVA撑枱脚。当日Annissa都好战斗格，一身Sporty Look的她穿上白色长袖Tee，贴身剪裁令双峰超「凸」出，目测估计达C Cup。起初Philip充当聆听者，合埋口耐心听女方一轮嘴狂讲，其间对住靓女心花怒放的他，仲忍唔住一路咪咪嘴笑，酒窝几乎冇消失过。待对方讲饱后，Dry足6年的Philip出尽奶力冧女，其间七情上面、郁晒手地发表伟论，记者隔住块玻璃都戥佢哋紧张！

手仔Touch Touch
而伊人都明显好受落，一时擘大眼无辜样托腮，一时又头侧侧含情脉脉望实Philip，互相嗒糖；之后Philip再拎出手机，与Annissa头贴头一齐睇片，唔知播紧咩咁得意呢？𠱁到女方化身人肉Emoji不时惊讶掩嘴兼哈哈大笑，他仲乘机Touch吓Annissa手仔，来个肌肤之亲，睇嚟Philip都唔系咁木独啫！倾咗超过半小时先埋单，Philip随后Gentleman地陪女方行去南华会，沿途Annissa继续讲，Philip就好避忌，刻意行到离行离罅，还不时望吓途人。将Annissa送到目的地冇耐，Philip一边行返去地铁站一边低头揿电话，估计都系同女方难离难舍，继续Message中，恭喜定Philip先。