直认曾有自杀念头 张致恒老婆自爆只得$200

张致恒早前被指携妻儿走佬避债，其妻区燕雯（雯雯）连日在社交发长文，但随后又删掉，今日她再贴过年时跟大仔的合照，另一张是她与婆婆的合照，发长文向朋友报平安，并自爆身上现金只得$200。雯雯留言：「朋友…唔使担心 我冇事亦都冇癫到 只系最近发生太多事 面对唔到同有爆煲嘅情况」。
雯雯续自爆：「要自己照顾两个仔同成个屋企 现金只系得$200 所以有啲惊同唔识应对 再加上 有太多我唔知情嘅事情发生 去到我知道嘅时候已经系俾人闹紧嘅时候 所以开始有啲睇唔开 有自杀嘅念头 我承认我系有唔成熟同太脆弱」。
雯雯称在囝囝帮她抹泪、摸她嗲她时令她醒觉不能放弃，要坚强面对才能陪他们到将来，并谓：「我相信只要我哋愿意去努力 我哋一定可以好快 报答到同还清所有嘅金钱。」最后雯雯感谢婆婆在她最绝路最旁徨最迷失时作为她的天使。

雯雯全文：

朋友..
唔使担心
我冇事亦都冇癫到
只系最近发生太多事
面对唔到同有爆煲嘅情况

要自己照顾两个仔同成个屋企
现金只系得$200
所以有啲惊同唔识应对
再加上
有太多我唔知情嘅事情发生
去到我知道嘅时候已经系俾人闹紧嘅时候
所以开始有啲睇唔开
有自杀嘅念头
我承认我系有唔成熟同太脆弱

但系当我去到我流眼泪嘅时候
个仔会埋嚟摸吓你帮你抹走啲眼泪
当我唔开心嘅时候
佢好似明白咁样
过嚟拍下你摸吓你嗲下你

嗰一刻我先醒觉
我唔可以放弃
因为我冇权带走佢哋嘅生命
嗰一刻我同自己讲我一定要坚强
要努力面对一切
先可以陪伴到佢哋去佢哋之后嘅人生

我而家唔系要公开同大家讲啲乜嘢
我只系想喺呢个平台同真心关心我担心我嘅朋友讲声我冇事唔使担心
至于..
要留言甚至去中伤我嘅网民
我已经收到晒你哋嘅说话
你哋唔喜欢亦唔需要继续去睇我呢个平台
大家为咗一个唔认识嘅人去咁劳气有咩意思呢
依家香港人人都有困难，
无谓为咗一个你哋唔认识嘅家庭去劳气。
希望所有人都可以捱过呢个疫情。

我亦会好好组织自己嘅人生
我唔会再唔够胆抬起头望人
因为我哋只系争人钱未还晒
而唔系去逃避要去走数
所以其实我系唔需要抬唔起头做人
我亦会好好问清楚同组织好
欠我老公朋友嘅钱。

我相信只要我哋愿意去努力
我哋一定可以好快
报答到同还清所有嘅金钱。

婆婆：
你系我最好嘅聆听者同倾诉者
系爱最绝路最旁徨最冇咗最迷惘嘅时候
你系我嘅天使💕
要你老人家担心我为我伤心
我好不孝..
我唔知上一世要做几多嘅好事
先可以有你呢个婆婆
我爱你👵🏻