【独家】被指择偶品味「独特」 锺舒漫坚持爱情解释唔到

去年锺舒漫（Sherman）与前港姐陈洁玲出现生意纠纷，Sherman跟导演男友林灏轩（Steve）的恋情亦因此曝光，与此同时，坊间突然流出锺舒祺爆粗大闹Steve录音带，不满Steve要锺母帮他洗底裤，真系一波未平一波又起。唔少Fans担心Sherman再变做容易受伤的女人！Sherman却说：「世界上冇一个case有must嘅，喺呢行都有好多对令我跌眼镜嘅组合啦！」采访：方骞平 场地：THE STADIUM@观塘兴业街

关于跟陈洁玲嘅生意纠纷，锺舒漫要入禀小额钱债审裁处追讨44,286元本金，由于双方拒绝和解，案件押后到今年再审。Sherman唔想多讲呢单纠纷，但坦言有好多失望，包括对认识嘅人，上咗一课。

Sherman的前度吴浩康曾多次「偷食」，再前度张致恒又系「偷食」惯犯，现任男友亦被爆出唔少黑材料，Sherman维护男友说：「你点知边啲系渣男，边啲唔系呀？never know！好多嘢都冇样睇㗎嘛！就算几天作之合，相处咗10年，但最后都系出事，所以点样去界定呢？喺呢行都有好多令我跌眼镜嘅组合。」她强调对每段感情都有付出，对得住自己及对方，唔会因为以前经历感到后悔，甚至影响将来嘅选择。问到喜欢Steve乜嘢？她甜蜜说：「爱情解释唔到，虽然好多人睇表面后有好多判断，但实际上每段关系，两个人经历过啲乜，当事人先知。」

Sherman重申男友冇要求妈妈为他洗底裤：「我妈成日提醒我：『自己啲内衣裤要用手洗嘅，因为咁先系最乾净，最有保护作用。』呢啲好普通嘅生活细节畀人抽出嚟无限放大，并且变成好负面，其实我都会帮妹妹洗底裤啦！」而锺舒祺同Steve目前关系好好，「佢哋冇嘢好耐了。」