【独家】享受拍戏被打 谭耀文《逃狱兄弟》挑战父女情

谭耀文(阿谭)喺新片《逃狱兄弟》中饰演有情有义，受尊重嘅前江湖大佬「滚筒哥」，片中他打得唔算多，但依然好有挑战性：「惟一有场阿谭同张建声肉搏戏，两人喺碌架牀度撞来撞去，拳脚碰撞擦伤难免，我反而最怕听到碌架牀移位时发出嘅刺耳声响，听到耳都痹晒！另外，爬通道逃狱时畀铁片刮伤、着住对监犯鞋喺操场劲跑刮到双脚起水泡等。外边人见我成日拍打戏，有时打到变猪头，以为我好可怜，其实我好享受，因为太爱演戏。」至于另一条主线讲父女情，指他讲喺狱中好挂住个女，所以一见到伍咏薇及陈汉娜母女嚟探监就喊：「现实中都我都系爸爸，所以好有感受，今次我会将20几年演戏经验一次过开仓。」

拍《叶问3》被泰臣对打惊足十世
阿谭拍咗10几年打戏有一定经验、心得及技巧，他坦承最怕同欠缺经验嘅新人对打，所以今次同栢天男交手都会特别紧张，幸而对方表现镇定，唔算惊惊青青，咁样合作起嚟会安心啲：「咁耐以嚟我畀人打伤多不胜数，有啲都记得，但唔点名讲，费事以为我记仇。做新人时都试过打伤人。而一生人最惊最惊，甚至惊足十世，最危险一次系拍《叶问3》畀泰臣打，大家知泰臣喺擂台上打到对方入晒『厂』，甚至咬甩耳仔，不过佢好清楚只系拍戏，而经验话我听，愈识打嘅人，拍戏会愈小心。」

《龙在边缘》向古仔开枪痛心疾首
另外，之前他同古天乐拍《龙在边缘》都好伤：「当时剧情讲我见到古天乐走过，以为对方喺我前面，就向镜中嘅古天乐开枪，因为楼底好矮，冇谂到六分厚玻璃会被开枪声音震碎，爆玻璃搞到我块面花晒，简直系痛心疾首，好彩玻璃冇入眼，而医院又喺附近，最后极速去医院洗伤口。好记得嗰晚仲要做梅艳芳2001年演唱会嘉宾，载歌载舞演唱《烈焰红唇》，因为拍戏同唱歌两样都系我锺意做嘅嘢，就算负伤仍坚持去演出，呢件事令我一生难忘。」