【维港会】港龙空姐变餐厅经理 「贴地」服务闯新天

国泰航空去年十月大裁员，又停运旗下港龙航空，计划做空姐做一世嘅Ivy喺嗰日梦碎，但佢无放弃自己，转去追求另一梦想，成为高级意大利餐厅经理，佢话希望学有所用，将机舱嘅服务经验「由天空带到地面」，做个贴地嘅服务业人员。

Ivy之前系港龙头等舱务长，佢话估唔到咁大家公司停运，去年十月得知消息嗰阵，忍唔住喊咗。佢话，十五岁嗰阵梦想成为空姐，二○一三年大学毕业加入港龙，服务咗七年，打算做空姐做一世，谂唔到有一日梦碎。

失业两个月，Ivy投过五十份简历，试过转行同搵工嘅艰辛，庆幸有屋企人支持，无经济负担。直至十二月，喺朋友介绍下，佢入职高级意大利餐厅Crit Room，转身变做餐厅经理兼宣传大使。Ivy话，做空姐嗰阵学到嘅，如体贴嘅服务、对咖啡、红酒嘅认识等，可以喺餐厅大派用场。仲有食客赞过，一睇就知佢以前做过空姐，令佢深信，将机舱嘅服务经验「由天空带到地面」系得嘅。被问到如果日后有机会，会唔会再做空姐，佢笑住话，其实只要学有所用，做边行都得。