【独家】同细女绕住手行街如姊妹　60岁毛舜筠周街捽鼻好危险

上个月啱啱60岁嘅毛舜筠就真系美魔女嘞，Keep到身形冇发福，五官又唔胶，呢点好重要。日前就见到毛姐同20岁细女区亦山去铜锣湾行街，两个人绕晒手好温馨，期间毛姐突然鼻痕，见佢除口罩系咁捽，虽然毛姐都算小心，拎住纸巾慢慢捽，不过周围好多人喎，有啲危险啫。采访：梁志明

对毛舜筠上个月庆祝60岁生日好有印象，因为1984年喺剧集《鹿鼎记》中饰演「韦小宝」嘅梁朝伟，亦为当年其中一位老婆仔「沐剑屏」即系毛舜筠出山贺寿，正印老婆刘嘉玲及吴君如都有现身，张生日合照超经典。

幸福人办
当日夜晚七点，毛舜筠同细女绕住手由百德新街行去皇室堡，一见SEPHORA即入，两母女各自睇嘢，一个专攻护肤品，一个就情倾化妆品，行足20分钟，阿妈冇嘢啱，阿女就买到嘢。离开时，正等过马路嘅毛姐突然拉开口罩，用纸巾系咁捽鼻，周围咁多人行过，动作相当高危。正享受人生嘅毛姐好幸福，有囡囡陪行街之馀，月前佢出席活动，亦有老公揸车接送。因为开心所以唔识老，难怪毛姐咁鬼Young。