【独家】胞弟出事后见到高楼大厦好惊 黎美言偕母睇心理医生自救

女子组合HotCha成员黎美言（Winkie）胞弟黎嘉骏（Harry）于10月16日从寓所高处堕下身亡。事隔个多月，Winkie才走出丧弟阴霾，但精神及心理状态仍未平衡：「𠵱家好畏惧高楼大厦，就算收到妈咪嘅电话都好惊。」采访：方骞平 场地：The Wave@观塘兴业街

28岁胞弟Harry出事个多月后，黎美言语带平静忆述经过，强调永远忘不了胞弟出事当天情景：「嗰朝准备同男朋友食蛋糕提前庆祝33岁生日，突然接到妈咪来电，电话入面传嚟妈咪失控嘅尖叫声，知道细佬堕毙，第一时间返屋企了解情形，同妈咪分开咗嘅爸爸同样返咗去，我见到父母都好伤心，当刻忍唔住上前锡咗爸爸4啖去安慰佢，同埋理智地安排两老离开现场，安排妈咪入住酒店。」

黎美言和妈咪及细佬相依为命多年，Winkie帮手凑大细佬，帮他换尿片，感情一直好好。「头一个月好崩溃，见到高楼大厦会好惊，喺高处望落去，自然会谂『究竟感觉(堕下)会点？冇咗个最亲嘅人，系咪要继续(生存)落去？』妈咪好惊我会做傻事，我又好惊妈咪会睇唔开，我担心到晚晚瞓得唔好，好惊电话会响。」Winkie坦言生活节奏乱晒，更要同妈咪睇心理医生，寻求专业治疗。「有至亲离世，伤痛系必然，需要好长时间先可以康复。不过，呢件事教晓我学会将过去发生咗嘅事重新赋予定义，更加要关心身边人，有情绪问题唔好怕羞耻，要去睇医生。」