曾帮祖儿伊健斟茶递水 周柏豪预告明年给爱妻弥补遗憾

周柏豪受访港台节目《旧日的足迹》，自爆18岁那年的柏因满面爆疮失去模特儿工作，拥有七级钢琴造诣的他，当年也就加入著名音乐创作人陈光荣的录音室当义务工程师。柏豪忆述：「第一个星期我遇上容祖儿嚟录音，我帮佢斟水、抹咪、搬櫈，佢当然唔识我，我亦都冇自信，唔敢望佢，到依家我都唔敢话畀佢听。我最开心见到郑伊健哥哥，佢系我超级偶像，我会偷偷地望佢，偷听佢唱歌，当时水机换水、洗厕所、叫外卖通通由我包办，我好自豪我系『叫外卖专家』，七八个人，每日三餐，我全部叫啱，原来听人讲嘢，系要用个心去听，先至唔会错！」

暗疮期的柏豪遇上了他现今的太太朱小姐并展开追求，当年他为保护女友可以去到好尽：「我哋冇资格豪食、豪饮、豪住，初期好多时都系由佢（朱小姐）埋单，佢从来唔介意，所以如果歌迷唔接受我结婚，我唔会在乎冇咗份工，因为我好爱呢个女人！十年来我冇公开拖过佢只手，我哋净系买外卖返屋企食，因为（咁样就）唔会惊，好安全。最惊嗰次都系2016年带住只求婚戒指去富士山向佢求婚，我偷咗佢只戒指去度size，最惊过关嘅时候俾人查出，如果申报又怕俾佢发现，于是我话不如我哋两个分开行（过关）。海关（关员）问我只戒指系乜嘢？我话用嚟求婚，佢讲咗啲嘢，我唔知道系乜，佢冇没收，可能佢系祝福我！情人节嗰日求婚成功之后，天上竟然出现一道彩虹，我知道系上天对我嘅祝福。」

不经已流露浪漫天性的柏豪亦坦言，希望弥补对爱妻的遗憾：「如果人生可以返转头，我希望填补一个遗憾，就系因为我哋怕结婚消息通天，我冇喺佢试婚纱嘅时候陪住佢，为佢拉拉链，再听佢问我『我靓唔靓？』，然后我再答佢『你系最靓』呢个环节……不过我哋已经结婚4年喇，出年第5年，我会做一件事，就系抱住囡囡陪太太再穿婚纱，同佢拉拉链，补返同佢讲嗰句佢系最靓嘅！」

柏豪形容疫情下与初生女儿相处时间多了，是千载难逢的缘份，他更笑言「重金礼聘」4个月大的囡囡在新作品《劫后馀生》MV中亮相：「哈！佢（囡囡）嘅报酬系两粒饼仔，（囡囡出现）一两个镜头无伤大雅，呢个亦系我同囡囡嘅一个记录。MV系喺我家屋企拍摄，全屋都系人，佢好兴奋冇瞓晏觉！依家我唔会应酬，完成外面嘅工作第一时间会返屋企凑女，我希望再多生两个，先嚟一个仔，凑够一个好字！当然我都会继续努力工作，我嘅目标系将每一个范畴都做到最好，如果大家认为『天王』系（娱乐圈）最高级别，我希望自己能够达到呢个级别！」