黄雨警告下返铺头受伤 39岁陆诗韵「爆甲」见红

陆诗韵(Sharon)系05年港姐亚军，演艺事业麻麻，但感情生活好丰富，经常有拖拍，而另一半一定好富贵，所以有富豪追击手之称，不过追击手都有生锈嘅一日，近年冇乜点听过Sharon拍拖，09年离巢TVB后就转行做美容，做生招牌应该都几搵到，仲要愈做愈靓，靓到唔系好认得添。

话晒系老板，Sharon当然会利用社交平台卖吓广告，好似6D眼睫毛，Sharon声称做咗超过3年效果一直都好满意，仲话「唔使化眼妆，都可以睇落精灵。」不过张相就化咗妆嘅，仲几浓添。

咁作为老板，Sharon都好亲力亲为，就算今日天文台发出黄雨警告，全港落雨落到黐晒线都亲自落铺头拎嘢，仲唔小心搞到「爆甲」见红，手指留血咁大件事当然要影相放上IG吸关心啦，佢话，「落大雨，落车去铺头攞啲嘢，咁都搞到爆晒甲，好痛啊，我都系唔适宜太操劳。」胡渭康同Ann Ho都表示担心，一个叫佢小心啲，一个就哗咗一声，仲有Fans留言惨惨猪，唔睇相以为佢伤到见骨啊。