【独家】抗疫「救世煮」　Homemade甜品狂吸脂　厚切千嬅超市急扫千四蚊水果

46岁杨千嬅自诞下儿子Torres后，一直都冇放弃幕前工作，但因为年初爆发新冠肺炎，所有Show同工作一律取消。忽然清闲的千嬅，留港抗疫期间变番做「丁师奶」，为老公和囝囝努力钻研厨艺，短短4个月已升呢「烘焙达人」，整New York Cheese Cake同焗南瓜牛奶布丁，连带体重都一齐飙升！日前，千嬅同司机现身IFC超市，并喺10分钟内光速扫走约1,400蚊的日本超靓水果，见千嬅嘅身形向大码进发，Oversize长袖卫衣都遮唔晒巨趸同粗髀，抗疫肥真系害人不浅！采访：张咏森

因为上月爆发第三波疫情，政府勒令食肆禁晚市堂食，不少人被迫留家煮饭，但「丁太」杨千嬅却乐在其中，由一开始疯狂焗苹果批、红萝卜蛋糕、芝士蛋糕等，到后来煮埋咕噜肉、醉鸡翼、豚肉烧卖、黑豚肉流心蛋饭团等，厨艺火速Upgrade，难怪一直觉得千嬅不懂煮饭的丁生，都喺IG晒命话「咁落去好快变猪」、「日日做运动都唔掂」、「佢希望喺短时间之内将我谷肥」，仲封老婆为「蛋糕女王」、「救世煮」，把口真甜！

司机陪买水果
见老公狂赞又引到班网民流晒口水，千嬅呢铺下厨瘾完全停唔到，一得闲就挑战新食谱再放上网呃Like。好似近日疫情严峻，大部分幕前工作又再叫停，日前唔使开工的千嬅就同司机快闪中环IFC买食材。当日下午4点几，摄氏30几度，仍穿蓝色长袖卫衣衬黑色长裤的千嬅，戴上口罩杀入超市，一入去就直接走到冷藏柜前拣选水果，估计她准备再整甜品。

侧身真系好厚
虽然只系整畀家中两位「大爷」食，但千嬅一啲都唔马虎，眼中只有日本空运的高质水果，包括一抽约460蚊的日本黑提子、一抽约530蚊的日本香印青提子、一Pack两个约340蚊的日本山梨县黑色印章大糖领桃及约70蚊两个的日本乔纳金苹果，合共盛惠1400大元！全程用咗唔够10分钟，千嬅便火速去Cashier埋单走人，而同行的司机哥哥就帮手推住几袋嘢，一齐落停车场取车返归。相信抗疫期间边煮边食增磅唔少，千嬅一步出超市弯腰整理物件，下身「豪华臀」与厚切大髀无所遁形，目测起码胀咗一个码，睇嚟千嬅要跟丁生一齐去做吓运动嘞！