【独家】三代同堂 霍震霆沙滩凑孙晒太阳　霍启刚做外卖仔照顾老嫩

贵为霍英东集团副总裁的霍启刚（Kenneth），身兼港协暨奥委会副会长和香港出版总会名誉会长，近日积极为业界争取政府支援，虽然公事繁忙，但都不及Family day行程咁紧凑！在「封滩令」前的周末，Kenneth于摄氏30几度高温下，戴住口罩陪6岁大仔霍中曦（Lawrence）及3岁次女霍中妍（Laurissa）喺浅水湾寓所旁的沙滩玩，同行仲有74岁的父亲霍震霆及外母；至傍晚时，贴心的Kenneth化身「外卖仔」到附近的餐厅买定Dinner，再返回沙滩接仔女及帮老人家收拾晒太阳孖宝，即太阳遮同沙滩椅，而白到反光嘅霍震霆就拎住个口罩爽住返归。采访：张咏森

最近，霍太郭晶晶接受访问，透露不会让小朋友继承衣钵，反而希望仔女好好读书，所以自幼便培养大仔Lawrence的阅读习惯，而霍启刚更早已买定4张书展入场券谂住带妻儿去扫货，可惜因第三波疫情在港爆发，贸发局宣布书展延期举行。

沙滩亦戴罩
因为第三波疫情严峻，专家已作出劝告希望市民尽量留家，不过大人忍到小朋友就难啲。早前傍晚5点几，刚搬入逾1.6亿港币浅水湾豪宅的Kenneth，就同外母带住大仔Lawrence及次女Laurissa去寓所附近的海滩玩水，而爸爸霍震霆亦有跟埋去，郭晶晶则未有同行，相信留家凑细女「中怡」。虽然当日摄氏30几度，烈日当空晒到应一应，但穿白Tee、长裤加波鞋的Kenneth仍全程「罩」不离口，见佢踎喺侧边𥄫住一对宝贝玩沙同玩水，唔怕焗，防疫做足100分，真系抵赞！

多功能老公
其间，郭妈妈充当「小助手」帮两个孙一齐砌城堡，霍震霆就瞓喺自备沙滩椅上享受日光浴，74岁嘅佢白到反晒光，身形算系咁！见差不多够钟食晚饭，Kenneth就开始劝仔女执嘢返屋企，郭妈妈亦带住Laurissa落水洗「架生」，但Lawrence似乎意犹未尽继续玩，Kenneth亦冇咁好气，见老窦企起身摺起张櫈准备走，佢都即刻上前帮忙收遮、孭櫈离开，之后Kenneth又化身「外卖仔」到餐厅取回预先Order好的晚餐，「多功能老公」非你莫属啦！最后要提醒大家，鉴于疫情严重，为己为人都系多留家中，就算外出都谨记戴口罩呀！