【头条独家】58岁做运动伤颈心情唔好　杜德伟夫妇怒火街头

58岁杜德伟（Alex）去年12月于北京展开巡唱，惜碰上新冠肺炎，其他站的演出均要延期举行，乐得清闲的Alex就趁机陪太太李晓冰(Ice）和3岁儿子AJ。早排一家三口去马骝山远足，Fit爆的他更获苏永康大赞「永远都系偶像派」。Alex Keep得好全靠勤力健身，惟最近他做运动时整伤，近月要戴住颈箍出街。可能天气热加上戴颈箍唔舒服，日前见到心情麻麻嘅「永远偶像」相当好火气，跟老婆在中环街头吵大镬，好在隔咗一个礼拜，二人又Sweet爆去又一城食Tea，两公婆又点会有隔夜仇吖？采访：李维隆、谭壹致

杜德伟和太太李晓冰早前撇低囝囝出中环，当日下午约3点，两人于威灵顿街等车，穿上牛仔衫裤、戴Cap帽的Alex颈上多了个箍，而且造型都好特别，骤眼睇有啲似笠住BB厕板！其间，倾得好哋哋的两人不知为乜嘈起上嚟，Ice更愈讲愈劳气，Alex驳了两句就收声，以为告一段落，点知一见太太耷低头，他即转身用手指喺魂精位「系咁圈」意味黐线，究竟咁大胆话老婆？抑或针对讲紧的话题呢？之后他又借尿遁，一齐入咗附近商场去厕所，沿途Alex亦拍拍Ice释出善意，惟上车前，见到记者上前打招呼，两公婆却充耳不闻急步上车。

冰释前嫌
正所谓「牀头打交牀尾和」，事隔一个多礼拜，杜氏夫妇又恩爱到又一城Greyhound撑枱脚，席间二人脱下口罩一边食一边倾，是日Alex心情劲好，连饮啖水都望住老婆甜笑，So sweet，不过提醒一吓呢位爸爸，近日疫情虽然稍为缓和，但周围摸完仲咬手指、咬眼镜，似乎唔多卫生！食足两个钟Tea后，夫妇俩又外卖多盒Cake，相信是买给为食囝囝；离开商场时，仍戴住「厕板箍」的Alex却不顾颈伤，继续狂揿手机做「低头族」，但最好笑系等车的10分钟之间，跳开舞的Alex都按耐不住周身郁，又狂转眼球，甚至如机械人般僵硬地左右拧，神情趣怪！

懒做热身
事后慰问Alex老婆有关Alex伤势，Ice以短讯回覆：「冇嘢，佢喺屋企做运动扭亲吓。」当记者笑住问为何如此搏命？她说：「懒做热身，下次会注意，其他唔讲啦，谢谢。（几时受伤？有冇睇医生？）都系嗰句，唔讲咁多啦，唔系咩咁大件事啫，多谢关心。」最后，Ice仅透露老公至少要戴颈箍1个月，其后公关来电强调Alex并非「古灵精怪」整伤，相信他咁Fit会好快康复。