【头条戏场】《无痛断舍离》衰女人的赎罪券

导演系拍《恋爱病发》嘅Nawapol Thamrongrattanarit，女主角系《出猫特攻队》嘅Aokbab，仲有泰国男神，《大佬可以退货吗?》嘅Sunny，因为以上三个人，所以无睇任何介绍就入场睇，结论系一套唔算浪漫但会睇到戚戚然嘅爱情片，适合在爱情路上习惯自私，觉得自己无问题人哋错晒嘅人观看。全片最佳对白，「有些事你假装忘记了，但不代表没发生过。」(上映中)撰文:廖思慧

故事好简单，设计师阿静（Aokbab 饰）好锺意北欧简约风，打算将乱到七彩的家居变成空间感十足嘅北欧屋企，首先你要有间屋，咁佢有仲要非常大间，因为老窦剩落畀佢，然后就要大扫除，佢受到日本「断舍离」意念影响，即「断绝不需要的东西；舍去多馀的事物；脱离对物品的执著」。

有啲女人真系好乞人憎
阿静好努力实行， 执吓又睇吓，然后佢发现大量物件，包括陈年朋友借畀佢嘅物品、某年某日佢帮人买过嘅物品、积聚好多年的生日礼物及前男友(Sunny饰)的菲林相机。沉迷「断舍离」加上性格比较无情，阿静愈掉愈多，之后因为老友一句说话唤醒咗佢。原来当年阿静曾经一声不响离开前男友，不伤不痛地活了多年，因为一部旧相机，阿静突然觉得要好好完结，佢决定将相机亲手送返畀旧男友。Well，有啲遗憾唔系你想弥补就可以弥补，亦唔系你想几时道歉，人哋就随时Ready原谅你，麻烦留意返，赎罪券可以用但唔代表对方要接收罗。