直击曼谷宵禁第一晚 胡慧冲：条街静到有啲凄凉

为减低新冠肺炎疫情，昨日系泰国进入紧急状态令第9天，亦系曼谷第一晚宵禁，居泰港人胡慧冲(Roger)分别喺屋企骑楼，屋苑大门口直击晚上十时后宵禁的状况。他形容，条街真系静到有啲凄凉感觉，但他希望今次大家可以唔出街，齐心嚟抗疫，若然大家唔听话「揽炒」，确诊数字愈嚟愈多嘅话，泰国政府有可能进一步实施24小时宵禁，咁到时就冇得外出拍片了。

宵禁令由每晚十点至凌晨四点，所见首晚宵禁中嘅曼谷市面水静河飞，成条大街冇车又冇人，只见警车巡逻，Roger说：「泰国呢度好耐冇试过宵禁，十年前经历过红衫军，相对今次宵禁，气氛其实唔紧张，同埋喺宵禁前，商场、店铺、按摩店、酒吧、娱乐场所等全关门，大家冇得去蒲，早已适应咗市面嘅宁静。」

他又搞鬼打上煲呔换上礼服，喺宵禁前叹法国晚餐！其实只系自我感觉良好，叫咗法国菜外卖回家，幻想去咗法国餐厅食大餐：「外卖都好味㗎，$300几蚊港币已柯打到黑松露汤、法国田螺挞、法式田鸡腿、炸薯条、宽条面，仲配埋汽水。」同时，他又将食外卖相拼贴落日本旅行旧相，笑言要开开心心带出正能量：「宵禁又唔系失禁，唔系世界末日，唔好太伤感，应该喺疫情中互相扶持，𠵱家泰国佛庙免费派发口罩及饭餐畀失业人士，发挥互助精神。」