【头条独家】脑膜炎险死 黑妹同游大马避疫 韩马利返港开工忧中招
2020-02-24 21:00 
喺新冠肺炎疫情威胁下，曾患肺癌第一期嘅李丽霞(黑妹姐)及去年八月因脑膜炎昏迷医院一周嘅韩马利(Mary姐)，月初不约而同去咗确诊数字较少的马来西亚避疫，在当地除低口罩呼吸清新空气，放轻松玩咗一星期，好好享受人生。不过，回港后Mary姐随即投入拍TVB新剧《食脑丧B》，Mary姐曾经半只脚叉咗入鬼门关，体质已大不如前，喺高危期开工，坦言心慌慌，仲自爆日前畀同枱，系咁咳嗽嘅临记伯伯吓亲添！ 采访：方骞平
65岁的Mary姐病愈后体会到人生无常，应及时行乐，见身体向好，所以月初同妹妹、老公杜燕歌、老友李健达走转大马怡保及金马伦happy吓，「今次玩得真系好开心，除咗李健达教咗我哋好多自然疗法外，朝早五点起身去沙沙兰睇『天空之镜』都好有惊喜，呢个黑沙滩喺特定退潮嘅日子同时间，地面浮现中央沙洲，呢啲天然嘢好神奇。另外，当地啲嘢好好食，就算街边大排档都好食都不得了，我哋日日喺朋友间酒楼开餐，睇住个裤头由松变紧，好想喺度长住，可能下次再去睇屋，顺道睇验吓当地生活。」
相约黑妹姐开饭
咁啱同时间黑妹姐同囡囡、两个孙仔去浮罗交怡探完妹妹后，齐齐落怡保探住喺当地嘅吴岱融、锺淑慧；姜皓文(黑仔)、金慧英，Mary姐等人就join埋一齐食饭，问她可担心变病毒party？Mary姐就话当时完全唔怕：「去到嗰度完全好free，都冇人戴口罩，啲人生活他他条条，冇人提冇人讲(疫情)，所以喺嗰度好舒服罗，返到嚟又要戴返口罩，见到啲人咁紧张，厕纸、口罩乜都抢，哎！真系两个唔同嘅世界呀！而且𠵱家有啲人真系好自私，其实生活物资够用就得喇，要留返啲畀人哋用，甚至有啲不良商人趁机抬价，对低收入家庭好惨，发国难财好阴功，冇晒人性。我哋喺当地都有扫少量防疫用品，黑妹姐要帮个女同两个孙入货，佢就比较疯狂，因为真有需要。」
有临记喺厂丧咳
返港不久，Mary姐即拍《食脑丧B》，她表示健康ok可应付，相信食多一个月精神科药物就全面停药，体弱的她喺疫情下唔戴口罩开工坦言有啲惊：「有乜办法呀！TVB又唔停工，唔停工都要冒呢个险㗎啦，嗰日喺厂拍麻将馆戏，现场有六至七枱麻将，全部坐满晒人，几惊呀！同枱有个临时演员阿伯喺度系咁咳，我谂佢应该只系浊亲，但同一枱都惊嘛，咁啱嗰日又有个临时演员喺电视城厂外呕吐，后来公司即时停厂消毒。有一日我都伤风作感冒，好彩冇烧，只系流鼻水，我好惊咁样返工会吓亲人呀！幸而食咗两包医生开畀我嘅高质量维他命C后冇晒事。其实我都惊㗎，自己抵抗力弱，唯有祈祷，而且唔敢行埋去人多嘅地方，以前一早入厂等人，𠵱家等人入晒去先。至于记忆力方面，监制话唔使好多对白，咁都OK嘅，不过，𠵱家容易皮肤敏感，肿起一旧旧连化妆都遮唔到，浮晒出嚟好核突，真系惨呀。」
最新回应